2 ka notadong tulisan sa Talisay City tiklo

CEBU, Philippines - Duha ka giingong notadong tulisan kinsa suspetsado sa pagpanulis sa Shell Gasoline Station sa barangay Lawaan III, dakbayan sa Talisay kagahapon sa kadlawon ang nasikop sa gipahigayong hot pursuit sa mga polis mga alas 7:00 pasado sa buntag sa nahisgutang adlaw.

 Ang mga suspetsado mao sila si Shundave Villarosa alyas “Shundave Oyon-oyon ug Jap-jap”, 30-anyos taga Camella Homes, barangay Lawaan I, Talisay ug Jose Rolando Coronel, 40, taga barangay Lagtang sa nahisgutang siyudad.

Ang mga mipahigayon sa hot pursuit operation Mao sila si Inspector Margienett Yosores, SPO1 Benjamin Sebellita, SPO1 Edgar Causon, SPO1 Mikie Espina, SPO1 Rolando Bastida, PO3 Benedicto Lasque, PO3 Ferdinand Pablo, PO3 Cecelio Miñoza, PO1 Stephen Sefuesca ug PO1 Gerald Rollon.

Ang duha ka suspetsadong tulisan diha masikop sa mga polis sa usa ka balay sa Block 7, Lot 36, Camella Homes, Lawaan I nga gipanag-iya ni Marygel Arriesgado. Apan ang maong balay giabangan kini ni Ehdah Lamano, 21-anyos.

Na-recover sa mga polis gikan sa mga suspetsado ang cash drawer sa gasoline station nga dunay sulod nga kwarta nga mikabat tanan ngadto sa P805, usa ka kalibre .357 magnum revolver nga dunay upat ka mga buhing bala.

 Ang mga polis naka-recover usab gikan sa posisyon ni Villarosa og usa ka dakung paketeng shabu.

Sa imbestigasyon sa kapolisan nga ang kahero sa maong gasoline station nga si Pani Matchitar, 26, nakabantay sa duha ka suspetsado kinsa nagsakay og motorsiklo nga Honda Wave nga nagtangag sa plakang 1341-IQ nga kadudahan og lihok.

Dihang mipaingon sa cashier’s booth ang mga suspetsado si Matchitar giingong mihapa kini sa kahadlok aron dili makit-an sa duha ka tulisan. Ang maong mga tulisan giingong mihulbot sa cash drawer nga dunay sulod nga kwarta agi diha sa  bintana sa cashier’s booth.

Si Yosores nga nahinabi sa mga tigbalita kagahapon nagkanayon kini nga gibana-banang mokabat ngadto sa P1,800 ang sulod sa cash drawer apan gituohang ang ubang kwarta nagasto na kini sa mga suspetsado.

Ang mga tulisan wala makadala og dakung kwarta tungod kay dunay palisiya ang gasoline station nga matag duha ka oras ang cashier mo-remit kini sa iyang halin.

Ang duha ka mga tulisan nakita kini diha sa close circuit television (CCTV) cam sa gasoline station.

Si Yosores mibutyag nga si Villarosa, suspetsado sa mga insidente sa tulis sa Talisay diin matag biktima sa tulis nga mo-report sa polis ang hulagway o deskripsiyon sa hitsura ug pamarog sa suspetsado ang ibutyag sa mga biktima.

Matud usab ni Yosores nga si Villarosa duna na kini mga kaso sa pagpanulis diha sa ilang buhatan.

Gibutyag ni Yosores nga ang nahisgutang gasoline station tulo ka higayon na kini karong nabiktima sa pagpanulis.

Niadtong buwan sa Disyembre sa milabay’ng tuig ang maong gasoline station natulis usab kini ug si Villarosa ug Coronel mao usab ang suspetsado sa maong insidente.

Matud ni Yosores nga si Villarosa misuway kini pagdagan dihang ilaha nang nalibutan ang balay nga gisudlan sa maong mga suspetsado apan naapsan kini sa mga polis diha likod sa balay.

Ang duha gikatakdang pasakaan og kasong pagpanulis, illegal possession of firearms nga dunay kalambigitan sa Comelec gun ban ug paghupot og ginadiling drugas karong adlawa diha sa piskaliya sa Talisay.

Ang kapolisan nanawagan sa mga biktima sa tulis nga moanha sa ilang buhatan aron pag-ila sa mga suspetsado alang sa dugang kaso nga ipasaka batok sa duha.

Sa laing bahin, si Villarosa dihang gihinabi sa mga tigbalita nagdumili kini og hatag og pamahayag samtang si Coronel nagkanayon kini nga nakita na sila sa CCTV cam.

“Dili na ika-deny nga nana may CCTV gud nakita man ta nagpahangin ra mi diha sa kuan (gasoline station) unya wala may tawo gud”, ni Coronel pa.  (BANAT NEWS)