Ancestral house naugdaw

CEBU, Philippines - Naugdaw ang usa ka ancestral house sa nahitabong sunog niadtong Biyernes sa gabii diha sa Miami Homes Subdivision, barangay San Isidro, dakbayan sa Talisay.

Hinuon walay gikataho nga naangol o nasakitan sa maong insidente.

Ang maong panimalay gipanag-iya kini ni Belen Bao, hingkod ang panuigon ug ang silingan niining si Clair Estrada maoy daling mitawag ngadto sa buhatan sa kabomberohan sa siyudad ug mi-report kabahin sa nahisgutang sunog.

Gibana-banang mikabat ngadto sa P300 mil ang danyos sa sunog ug gikatahong faulty wiring ang hinungdan niini.

Apan si SFO2 Felipe Abarquez nagkanayon nga nagpahigayon pa sila og follow-up nga imbestigasyon pagpiho sa hinungdan sa sunog ug diin dapit sa balay maggikan ang kalayo niini. (BANAT NEWS)