TCPS usa na lay patrol car

CEBU, Philippines - Misamot karon ang problema sa magamit nga sakyanan sa kapolisan sa dakbayan sa Talisay human ang nag-inusara nilang Innova patrol car naguba ning bag-ohay.

Mabantayan nga ang Talisay City Police Station duna na lang unta duha ka nagdagan nga sakyanan nga Hilux nga gihatag gikan sa Police Regional Headquarter ug ang Innova nga gihatag kaniadto sa kagamhanan sa Talisay.

Apan ang nahisgutang Innova napalyar kini niining ulahi lang.

Si Superintendent Elmer Lim, officer-in-charge sa TCPS miangkon nga naglisud gyud sila karon kabahin sa mobility niining pagkaguba sa Innova.

Hinuon matud ni Lim nga karong Sabado gilaumang modagan pagbalik ang Innova tungod kay  napalitan kini og spare part ug gipasulod na sa shop.

Ang OIC mapasalamaton kini tungod kay ang kagamhanan sa siyudad mitabang kanila nga mapaayo ang Innova.

Matud ni Lim kinahanglan unta gyud nila nga mapun-an og laing duha ang ilang sakyanan bisan og mga multicab lang aron magamit sa ilang inadlaw nga operasyon.

Ang kagamhanan sa siyudad niining ulahi lang mituman sa yangongo ni Lim kabahin sa pagpalit og mga bag-ong handheld radios nga karon gi-canvass na sa siyudad. (/EIM) (BANAT NEWS)