2 mil kapin ka punoang marijuana gilarot

CEBU, Philippines - Kapin sa 2,000 ka mga hamtong na nga punoan sa  marijuana  ang nalarot sa kapolisan gikan sa usa ka plantasyon niini sa  barangay Magsaysay sa lungsod sa Balamban niadtong Martes sa alas 3:30 sa kaadlawon.

Apan tungod sa kadaghan sa mga punoan sa marijuana nga anihonon  na unta, nahapnan  og  larot  ang  mga otoridad.

Si PO1 Johnrell Romero sa Balamban Police Station  mibutyag sa Banat News nga usa ka nagpailang concerned citizen ang mi-report sa ilang buhatan kalabot  sa maong  plantasyon  sa  gidiling  tanom  sa maong lugar.

Matud ni PO1 Romero  nga  nadiskobrehan usab  nila   nga adunay improvised nga mga gamit  sa pagbubo og tubig sa tunga -tunga nga bahin sa maong plantasyon.

Apan ang  kapolisan walay naabtan nga tag-iya o caretaker   kay  lagyo  kaayo  ang kabalayan  sa maong  lugar.

Si  C/Insp. Richard Oliver maoy  nangulo  sa team sa kapolisan  nga mironda  sa maong  lugar ug giabagan  kini  sa   mga  tanod sa pagpanglarot sa maong mga puno-an sa marijuana.

Si PO1 Romero nagkanayon nga ang maong lugar maoy usa sa pipila ka mga dapit sa bukirang bahin sa Balamban diin naghitak ang plantasyon sa marijuana.

Ang mga nalarot nga mga  punoan sa marijuana anaa  karon  sa buhatan sa kapolisan  sa maong  lungsod. (BANAT NEWS)