Ombudsman naguol sa pagka-dismiss sa usa ka kaso sa lamppost scandal

CEBU, Philippines - Gikaguol ni Deputy Ombudsman for the Visayas ang pagka dismissed sa usa sa mga kaso nga ilang gipasaka batok niadtong nalambigit sa kontrobersiyal nga lampposts sa 12th Asean Summit nga gipahigayon dinhi sa Cebu niadtong 2005.

Si Apostol nagkanayon nga naa silay igong ebidensya nga isuporta sa kasong  graft batok sa mga official ug sakop sa Department of Public Works and Highways (DPWH).

Matud niya dunay seven ka mga kaso ang ilang gi-file sa Sandiganbayan apan ang upat nahibalik sa ila “for further investigation.” Samtang ang tulo nagpabilin sa Sandiganbayan usa niini ang kaso nga na-dismiss.

Sumala pa niya kung dunay diperensya sa ebidensya nga maoy nakapa-dismiss sa kaso dili kini angay ibasol kanila kondili didto sa Office of the Special Prosecutor.

“When we filed the case we see to it, we have all the evidence,” matud niya.

Hinuon  matud pa ni Apostol mahimo pang mo-file sila og petition for certiorari sa Supreme Court ang Office of the Special prosecutor.

Ang mga gikasohan sa maong na-dismiss nga graft case mao sila si  kanhi former Lapu-lapu mayor ug karon Rep. Arturo Radaza, kanhi DPWH legal officer Agustinito Hermoso; kanhi DPWH-7 regional director Robert Lala; DPWH-7 assistant regional directors Marlina Alvizo  ug Gloria Dindin; ang division heads nga sila si Luis Galang, Restituto Diano, Buenaventura Pajo ug Pureza Fernandez, Lapu-Lapu City engineer Julito Cuizon ug assistant engineers Rogelio Veloso ug  Fernando Tagaan Jr.  ug Isabelo Braza, ang presidente ug chairman sa Fabmik Construction and Equipment Supply Co. Inc.

Si Radaza sa iyang bahin nagpasalamat sa pagka-dismiss sa maong kaso ug miingon nga masaligon siya kaniadto pa man nga wala gyuy kalambigitan ang mga lokal nga opisyal sa maong transaksyon kay ang national government maoy mihimo niini.

Sumala pa niini nga daan na siyang nagtuong mogawas ra gihapon sa kadugayan ang kamatuoran. (BANAT NEWS)