P50 mil nadawat nga reward sa informant

CEBU, Philippines - Pormal nang gitugyan ni Lapulapu City Mayor Paz Radaza ang cash reward ngadto sa  usa ka informant nga  nakapasikop sa   usa  ka most wanted person sa dakbayan sa Lapulapu kagahapon sa buntag.

Atol sa  press conference  pormal nga gipresentar ni Lapulapu City Police Office Director P/SSupt. Rey Lyndon Lawas ug Station 2 Police Chief P/CInsp. Conrado Manatad ang usa ka babaye nga maoy nakapahibawo sa kapolisan  bahin  sa usa  ka  wanted  criminal nga  misangpot sa pagkasikop ni Demetrio Aying Malingin, ang  usa   sa labing  gipangita  nga  kriminal  sa dakbayan sa Lapulapu.

Sa maong presentasyon nakadawat og P50 mil  cash si Gina (tinuod ngan gitago) isip  ganti  sa iyang  pagsuporta sa kapolisan ,  samtang  ang 11  ka  polis nakadawat  usab   og “Certificate of Appreciation” gikan sa kagamhanang local sa dakbayan sa Lapulapu  sa ilang pagresponde   nga  misangpot  sa pagkasikop ni Malingin.

Matud pa ni SSupt. Lawas   nga dako og ikatabang ang kooperasyon sa komunidad sa pagsikop sa mga kriminal  pinaagi  sa ihatag  niining  impormasyon  sa kapolisan.  

Gipasalig  usab ni Lawas nga ilang itago ang pagkatawo sa ilang mga informant  aron dili kini mahimutang   sa peligro sama sa ilang gihimo ni Gina nga maoy yawe sa pagkasikop ni Malingin.

Nasayran  nga  si Malingin   nag-atubang og duha ka kasong murder ug usa ka frustrated murder ug laing mga kaso sa pagpayuhot og illegal nga drugas isip usa sa supplier ug shabu sa dakbayan sa Lapulapu.

Samtang si Mayor Radaza sa iyang bahin nagkanayon   nga ang paghatag  og reward money sa  mga motabang  sa kapolisan  pagsulbad  sa krimen wala magpasabot nga wala na siyay pagsalig sa kapolisan apan makahatag kini og kakugi sa kapolisan ug sa komunidad  sa pagsikop sa mga wanted nga kriminal sa dakbayan sa Lapulapu.

Samtang  si Gina  sa iyang  bahin  miingon  nga iyang  gibutyag  sa kapolisan  ang  nahimutangan  ni  Malingin  sa iyang  kabalaka nga labing  modagsang  ang  gidiling  drugas  sa ilang  lugar  gumikan sa presensya  ni  Malingin  sa ilang  barangay.

Si Malingin  kinsa nasikop  niadtong Disyembre 26, 2012 nagsul-ob  og  bullet proof vest  ug  nakigpinusilay  sa kapolisan  una kini  madakpi.

Kahinumdoman nga si Malingin maoy mirapido sa balay ni Gerry Aying sa Brgy. Mactan  sa maong  dakbayan   ug  si Prima Aying   nga asawa  ni Gerry maoy naigo  ug namatay niadtong Hulyo 12, 2012.  Gumikan sa kaso niining duha ka Murder ug Frustrated Murder ug pagkalambigit sa pagpayuhot og illegal nga drugas ginganlan kini  nga  maoy   numero unong wanted   nga kriminal sa dakbayan sa Lapulapu. (Bong Soriano/WC)    

 Palace of Justice  sa Lapulapu  pabantaya’g  polis

Makigtambayayong ang kapolisan sa mga kadagkoan sa Palace of Justice sa dakbayan sa Lapulapu   alang sa hugot nga seguridad   niini aron kalikayan   ang   nahitabo sa Palace of Justice sa dakbayan sa Sugbo diin tulo ang  namatay   ug  usa  ang angol sa pagpamusil sa milabay’ng  Martes.

Si Lapulapu City Police Office Director P/SSupt. Rey Lyndon Lawas   nagkanayon  nga makigtagbo   siya  ni Lapulapu City RTC Executive Judge Toribio Quewag ug Lapulapu City Prosecutor Evangelene Gecale aron hisgutan ang seguridad sa Palacio sa Hustisya  sa maong  dakbayan.

Giangkon ni SSupt. Lawas nga walay polis nga  gidestino sa matag sala sa korte apan kung kini gikinahanglan andam  siya  nga mohatag   niini.

Matud  pa  niya  nga   ang  mga   private security  guard  nga maoy  gidestino  sa palasyo,  kinahanglang  suportahan  kini  og  polis  aron  walay  dautang  mga  tawo  nga makasulod  nga magdala  og  armas  sa maong  lugar.

Samtang si Mayor Radaza mimando na sa iyang mga security guard   sa palibot sa City Hall nga hugtan ang seguridad sa City hall ug rekisahon ang  matag  tawo  nga  mosulod  sa maong  dapit  aron  mapugngan   ang  mga  armado.

Matud pa ni Radaza   nga kontento  siya   nga  walay  si kinsa  mang  nagtinguha sa iyang kinabuhi gumikan kay wala siya’y kontra sa iyang pagdumala sa dakbayan sa Lapulapu o sa personal nga kinabuhi.  (BANAT NEWS)