Kanhi Sugbo TV crew mihimakak bahin sa nahanaw nga hard disk sa computers

CEBU, Philippines - Kusganong gipanghimakak sa mga kanhi kawani sa Sugbo TV ang pasangil nga gihimulbolan nila ang mga computers sa maong tv station tungod sa pagkahanaw sa mga hard disks sa maong mga computers.

Usa sa mga kanhi kawani sa Sugbo TV nga nihangyong dili magpaila tungod kay dili awtorisado nga mosulti bahin niini miingon nga dili tinuod ang pasangil sanglit wala man sila’y igong panahon sa pagkuha niini dihang gipasirad-an ang Sugbo TV niadtong Disyembre 21, 2012.

Sigon pa niini nga pasado alas 5:00 sa hapon nianang adlaw sa pagsira, ang labaw nga opisyal sa Sugbo TV nga sila si Rowena Zulueta ug Katrina Tabanao gipatawag sa buhatan ni Magpale ug gisultihan nga pasirad-an na ang Sugbo TV apan hatagan og igong panahon ang mga kawani sa pagkuha sa ilang mga personal nga mga butang.

Sa pagbalik ni Zulueta ug Tabanao sa buhatan, gitigum dayon ang mga kawani ug gipahibawo nga sirad-an ang Sugbo Tv.

Apan paglabay sa tulo ka minutos nangabot ang mga tawo ni acting gov. Agnes Magpale uban sa mga polis ug nimando sa pagkuha na sa mga butang sa mga kawani ug sila pagawason dayon. Matud pa niini wala sila’y panahon aron panangtangon ang nahisgutang mga parte o piyesa sa computers.

Enero 14, sumala pa sa source nag-imbentaryo ang Provincial General Services Office ug human niini wala’y gipahibalo ang maong buhatan nga may nahanaw nga parte sa mga computers, Enero 15 gibalhin ang maong mga gamit sa buhatan ni Bokal Arleigh Sitoy. (BANAT NEWS)