DSWD milista sa mga kabus nga pamilya sa CV
CEBU, Philippines - Ang Department of Social Welfare and Development (DSWD-7) gitakdang moapud-apod og National Household Targeting System for Poverty Reduction (NHTS-PR) nga gitawag nga Regional Profile of the Poor Booklet.
Sumala pa ni Kerwin Macopia, tigpamaba sa DSWD-VII nga sulod sa maong booklet mao ang pamaagi sa pagtabang sa kagamhanan sa paghaw-as gikan sa kakabus sa mga molupyo sa Sugbo, Bohol, Negros Oriental ug Siquijor.
Dugang pa niya nga ang maong booklet nagsukod usab sa personalidad sa kabus bahin sa kahimtang sa ilang panimalay, edukasyon, trabaho, hitsura sa ilang balay, pasilidad sa balay sama sa sugang dagitabnon, tubig, mga butang sa sulod balay ug ang kinitaan matag buwan. Gipadayag ni Macopia nga kining maong mga booklet ipang-apud-apod ngadto sa tanang Local Government Units (LGUs), National Government Agencies (NGAS), Non-Government Organizations (NGO's), ug usab Civil Society Groups sa Central Visayas (CV).
Gidasig sa DSWD-7 ang mga magpapatigayon nga mopirma og Memorandum of Agreement (MOA) aron sa pagkuha sa detalyadong breakdown sa tanang kabus nga pamilya sa rehiyon.
Adunay mokabat sa 106 ka kalungsoran ug syudad sa rehiyon ang mipirma og MOA sa DSWD alang sa panag-ambitay sa datos.
Sa pagkakaron, ang Bohol mipirma na sa MOA uban sa DSWD ingon man ang unang Congressional District sa Negros Oriental ug Bohol. Gawas sa mga ahensya sa gobiyerno, ang Ramon Aboitiz Foundation Inc. (RAFI), Outreach Program on Trainings, Integral Organizing and Networking for Solidarity Inc. (Options) ug Alay Lakad Foundation usab mipirma og MOA ngadto sa buhatan sa DSWD-7.
Ang NHTS-PR usa ka nasudnong proyekto sa DSWD nga moila kun si kinsa ang mga kabus sa nasud. (BANAT NEWS)
- Latest
