Odilao gikuyaWAn sa death threat
CEBU, Philippines - Si kanhi District Collector David “Boy†Odilao sa Bureau of Customs sa Puwerto sa Sugbo gibati og kabalaka niining hulga sa kamatayon nga iyang nadawat.
Si Odilao kinsa sa samang higayon gitawag nga amahan sa Sinulog mibutyag sa Banat News nga bisan niadto pang Nobiyembre 2012 nadawat niya ang maong hulga apan hangtud karon nagpabilin ang iyang kahadlok.
Ang maong hulga nga gipaagi sa text matag karon ug unya maoy mopatigbabaw sa iyang hunahuna hinungdan nga tungod sa kahasol may mga gabii nga dili siya makatulog, matud pa ni Odilao.
Kinsa bay dili mahasol ug makuyawan ning hulgaa nga nagkanayon, “sulti ni mam sa nahitabo sa Anad kamo si Odilao ug Rose maoy nakaingon nga na-disqualify ang Anad Partylist, kaning duha kinahanglan ato panimaslan ug paludhon usa putlan og li-og ug ilabay sa dagat ing mga hilabtanon, ipapatay mong duha sa madaling panahon unahon ang tigulang.â€
Matud pa ni Odilao nga human niya madawat ang maong text diha-diha gipa-blotter dayon niya sa kapolisan sa Talisay City Police Station.
Si Odilao kinsa nagpanuigon karon og 75-anyos nagkanayon nga nakasabot siya nga siya’y ginganlan og tigulang sa maong hulga.
Matud pa niya nga sukad siya mobiya sa Anad Partlylist nga girepresentahan ni Pastor Alcover Jr. mga upat ka tuig na ang nakalabay sige na siyang kadawat og hulga sa iyang kinabuhi.
Matud ni Odilao nga naghuwat lang siya sa hustong panahon kay nagplano siyang mopasaka og kaso batok sa mga responsabli.
Kahinumdoman nga si Odilao ug Alcover kanhi kini managhigala ug kaalyado sa Anad Partylist apan giingong nagkabangi bahin sa ilang partido hinungdan nga nabugto ang ilang maayong relasyon.
Ang Banat News misuway og tawag sa mga numero sa cell phone ni Alcover aron makuhaan kini og pamahayag sa maong pasangil batok kaniya apan wala kini motubag sa tawag. (BANAT NEWS)
- Latest
