LTO nasayop sa pamahayag nga wa mosunod sa restriction code ang drayber sa trailer truck

CEBU, Philippines - Nangayo karon og pasaylo ang  Land Transportation Office (LTO)-7 ngadto sa WT Construction Incorporated ingon man sa kabanay sa drayber sa prime mover nga namatay tungod sa sayop nga impormasyon nga ilang naluwatan mahitungod sa restriction sa driver’s license ni Antonieco Omagay.

Si Omagay maoy drayber sa prime mover trailer truck nga nalambigit sa aksidente sa kadalanan niadtong Miyerkules diha sa barangay Uling, dakbayan sa Naga nga mikalas og 10 ka tawo ug miangol og kapin singkwenta ka pasahero.

Giklaro karon sa LTO base sa ilang pagsusi nga ang giingong nalambigit sa maong aksidente mao si Antonieco Omagay Sr. nga taga barangay Punta Princesa, dakbayan sa Sugbo ug dili ang anak niini nga si Antonieco Omagay Jr..

Si Antonieco Jr. nagtrabaho kini sa usa ka forwarding company.

Kahinumduman nga ang LTO miluwat og pamahayag nga ang drayber sa trailer truck nga dunay gibug-aton nga 4,500 kilograms dili mahimong madala sa usa ka drayber nga kutob lang og code 2 ug code 3 restrictions.

Ang maong sayop nga pamahayag sa LTO nasuta dihang si Tina Roa, officer sa WT Construction Incorporated mipadala og kopya sa lisensya ug dokumentos nga nagpamatuod nga hanas ug may pagtugot si Omagay Sr. nga maka-drive og trailer truck nga usa ka articulated vehicle. Ang LTO ug Land Transportation Franchising Regulatory Board (LTFRB) nasipyat sa ilang gitumbok nga tawo nga giingong maoy nagmaneho sa nahisgutang truck.

Kahinumduman nga si Antonieco Sr. usa sa mga napulo ka casualties sa prime mover truck nga iyang gimaneho dihang gidaro niini ang Calvo bus.

Lima ka mga tawo ang namatay diha-diha sa maong aksidente ug uban sa mga biktima ang namatay ngadto sa Vicente Sotto Memorial Medical Center.

Sa maong insidente, si Ahmed Cuizon, direktor sa LTFRB-7 miluwat og kamanduan ngadto sa tanang bus company sa pagpaubos og safety seminar ug drug test sa tanan nilang mga drayber.

Sa laing bahin, ang direktor sa kapolisan sa probinsiya nga si Senior Superintendent Patrocinio Comendador nagkanayon nga padayon pa sila sa ilang gihimong imbestigasyon sa maong hitabo.

Ang resulta sa maong imbestigasyon maoy magamit sa pagpasaka og kasong sibil kung duna sa mga biktima ang moduso og kaso. (BANAT NEWS)