PNoy mitambong sa inugurasyon sa pabrika sa barko

CEBU, Philippines - Duha  ka  dagkong  kalihokan  dinhi  sa lalawigan  sa Sugbo  ang  gitambongan  ni  Presidente  Benigno Aquino III kagahapon.

Kini  mao  ang  inugurasyon  sa pagbukas  sa Austal Philippines Shipyard  didto  sa lungsod  sa Balamban  ug  ang  panagtagbo  sa  mga  opisyal  sa Liberal  Party  sa dakbayan  sa Mandaue.

Sa  iyang  pagpamulong  atubangan  sa kagatosan  ka  mga nanambong  sa  pagbukas  sa Austal Philippines Shipyard  didto  sa barangay Arpili, Balamban kagahapon  sa alas 11:00  sa buntag,  iyang  gidayeg  ang  mga  Australiano  nga  nagdumala  sa maong  pabrika  sa barko.

Kini  tungod  sa pagpili  sa Balamban  nga  maoy  mahimo  nilang  pandayan  sa  mga  barko.

Gipasabot  sa Pamuno  nasud  nga di  angay magmahay  ang  mga negosyante  sa     nagpadagan  sa Austal  sa pagpili  sa  Pilipinas  nga  pandayanan  sa  mga barko  sa gubat  sa   mga  sundawong Navy  nga  Amerikano  tungod  kay  ania  dinhi  ang de kalidad  nga  mga  trabahante.

Iyang  gipasabot  nga ang  Pilipinas  maoy ika-upat  nga nasud  sa tibuok  kalibotan  nga  pandayanan  sa  mga barko.

Ang  Austal  maoy nabantog  nga  kompaniya  nga  nagpabrika  sa tanang barkong  igugubat  sa  Estados  Unidos.

May  mga  pabrika  kini  didto  sa  Canberra,  Australia  ug  uban pang nasud  sa kalibotan  ug  kagahapon  ilang  giinugorahan  ang  bag-o  nilang  pabrika  nga  nahimutang  sa Balamban.

Gipasalig  sa pamuno  nasud  andam  ang  kagamhanan  sa nasud  sa paghatag  og  suporta  sa  maong  kompaniya  aron  nga  labi  kining  molambo  nga makatabang  pag-ayo  sa panginahanglan  sa  mga  Sugboanon  nga nangita  og  trabaho.

Maoy  hinungdan  nga gidasig  usab  sa pamuno  nasud  ang  mga Sugboanon  sa pagpaningkamot  nga mabansay  sa  mga  trabahong teknikal  ug bokasyonal  nga  gitudlo  pinaagi  sa  TESDA.

Samtang  pagkahuman   sa iyang  pagduaw  sa Balamban  miadto  usab  dayon  ang  pamuno  nasud  sa dakbayan  sa Mandaue  ug namulong  atubangan  sa  kagatosan  usab  ka  mga  miyembro  sa LP  ug  sa  mga suporter  niini  didto  sa Mandaue  City  Sports  Complex.

 Gipasabot  sa presidente  sa nasud  nga  ang   pagsinabtanay  ug  pagtuman  sa lagda  sa balaod  maoy labing  gikinahanglan aron motunhay  ang  kamalinawon  sa  palibot  ug  sa  kalihokan sa   kagamhanan.

Iyang  gipasabot  nga  pinaagi  sa maayong  kooperasyon  sa katawhan   ngadto  sa  mga  namunoan  sa lalawigan, siyudad,  kalungsoran  ug  bisan  sa barangay  dali  ra  masinatian  ang  kauswagan  sa ekonomiya  niini.

Matud  pa  niya  nga samtang  nagsingabot   ang  2016  nga  maoy  katapusan  sa iyang termino, iyang  paningkamotan  nga  kun  unsa kamauswagon    ang  ekonomiya  karon  sa nasud  mas labi  pa kining  modan-ag  sa kamauswagon  una  siya  manaog  sa katungdanan  sa 2016.  (BANAT NEWS)