CEBU, Philippines - Nawad-an og kapin sa P100,000 ang usa ka Koreano sulod sa usa ka kan-anan sa dakbayan sa Mandaue niadtong milabayng’ gabii.
Ang biktima nga si Tae Hyun Chun, 56, ug temporaryong nagpuyo sa Gethsemane sa nahisgutang dakbayan mao mismo ang miasoy sa kapolisan sa Station 4 sa Mandaue City Police Office (MCPO) kagahapon.
Matud pa sa biktima nga nangaon sila niadtong higayona uban sa iyang mga higala nga Koreano usab ug usa ka Filipina sa AA Barbeque nga nahimutang sa A.S. Fortuna sa Brgy. Banilad ug iyang gibutang ang iyang bag luyo sa iyang gilingkoran.
Base sa nakuha nga footage sa CCTV Camera sa maong kan-anan, adunay upat ka wala hiilhing mga lalaki ug usa ka babaye nga miabot ug nagpaka-aron ingnong mangaon sa maong higayon.
Milingkod kini duol mismo sa nahimutangan sa bag sa biktima.
Human sa pipila ka minuto, kalit nga gikuha sa babaye ang bag sa Koreano ug gipasa-pasa ngadto sa iyang mga kaubang lalaki dayong gawas sa kan-anan ug mipahilayo niini.
Gawas sa salapi nga P100 mil, ang maong bag may sulod usab nga Korean passport, ATM Cards ug lisensya sa pagmaneho og sakyanan.
Ang Koreano mibutyag nga wala siyay laing tuyo sa pag-anhi sa Sugbo gawas sa pagsaksi sa Sinulog.
Mipasalig ang kapolisan nga ilang pangitaon ang mga kawatan aron kini masilotan. (BANAT NEWS)