CEBU, Philippines - Usa ang patay ug duha ang angol sa dinasmagay sa duha ka motorsiklo didto sa barangay Jamgao, lungsod sa Argao niadtong Sabado sa gabii.
Ang namatay mao si Fernando Montejo Remoroza, 59, taga barangay Panadtaran, samtang ang mga naangol giila sa mga polis nga sila si Reuel Enbalzado, 34, taga barangay Catang ug ang iyang angkas nga si Adriano Saquilabon Amor.
Gikataho nga si Enbalzado nakainom apan wala kini kompirmaha sa mga polis.
Sa wala pa ang maong disgrasya si Remoroza nagsakay sa motorsiklo nga Motoposh nga walay plaka paingon sa barangay Poblacion gikan sa Panadtaran.
Samtang si Enbalzado nagsakay usab sa iyang motorsiklo nga Honda nga nagtangag sa plakang 7DU923 paingong mopauli sa barangay Canbanwa.
Si PO3 Rodrigo Teo sa Argao Police Station nagkanayon nga sa kurbadahon nga lugar si Remoroza giingong mikawat sa pikas lane ug wala kini makabantay sa gikasugat niya nga motorsiklo nga gimaneho ni Enbalzado misangko sa ilang pagdinasmagay.
Ang motorsiklo ni Remoroza mibaliwliw dayong kalamba niini sa karsada human mabag-iri sa motorsiklo ni Enbalzado.
Si Remoroza nga nalagpot, mitugpa ug napantok ang ulo niini sa sementadong karsada nga maoy hinungdan sa hinanali niyang kamatayon.
Gani patay na kini nga nahiabot didto sa Isidro C. Kintanar Memorial Hospital diin siya ihatud.
Samtang si Enbalzado temporaryo nga napriso sa Argao Police Station detention cell ug mag-atubang og kasong reckless imprudence resulting to homicide. (BANAT NEWS)