Sa ikatulong higayon Palma mibisita kang Gwen

CEBU, Philippines - Sa ikatulong higayon, giduaw ni Cebu Archbishop Jose Palma si suspended Governor Gwendolyn Garcia diha sa Kapitolyo kagahapon samtang gisaulog sa arsobispo ang ikaduha niya ka tuig dinhi sa Sugbo.

Si Palma mibutyag sa mga tigbalita nga igo ra siyang nagpasalamat  kang Garcia sa natabang sa gobernador diha sa simbahan ug isip usa sa mga tawong nahimong instrument nga nahimong makahuloganon ang iyang pagpuyo dinhi sa Sugbo.

Gipasalamatan usab niya Si Garcia sa kontibusyon sa probinsya sa Sugbo sa kooperasyon ug tabang sa national thanksgiving day ni San Pedro Calungsod niadtong Nobiyembre 30.

“I was just telling her daku kaayo ang iyang natabang sa simbahan,” matud pang Palma human sa iyang pakigtigom kang Garcia.

Dugang pa ni Palma nga iyang gi-ampo nga madali ug malinawong masulbad ang kaguliyang diha sa Kapitolyo tungod kay ang mga Sugboanon maoy naapektahan og maayo  niini.

“While we hope that the authorities - proper authorities will really decide soon we also pray as always for justice and fair judgment,”panawagan pa ni Palma.

Sumala pa sa Arsobispo nga bug-at ang kahulogan unya sa pagka resolba sa maong kaguliyang karong umaabot nga kapistahan ni Sr. Sto. Niño.

“Para sa akin kasi lalo na sa celebration of the feast of Sto. Niño it doesn't appear well to the province that people are coming to rejoice and yet many of the Cebuanos because of this situation really feel sad,” sumala pa ni Palma.

Mi-apelar usab si Palma sa mga Sugboanon nga motabang sa pag-ampo kalabot sa problema sa Kapitolyo tungod kay ang Kahitas-an ra gyud maoy tinud-anay nga mohatag og patas ug makatarunganong desisyon.

“We should always implore the guidance of the Lord so that what would happen would be just and fair decision reflected of God's will for the benefit of the people,” matud pa niya.

Samtang karong adlawa gipaabot nga mopagawas sa iyang desisyon si Garcia kung mosayaw ba kini sa umaabot nga Sinulog. Mao na kini unta ang iyang ika-siyam ka higayon nga mosayaw sa Pista Senyor nga iyang nahimong panaad sukad nga milingkod siya pagka-gobernador sa lalawigan.

Niadtong Disyembre 21, duha ka adlaw gikan gisuspenso si Garcia, gibisita ni Palma ang gobernador ug silang duha ug mga kabanay sa gobernador nag-estorya sulod sa usa ka oras.

Ang Arsobispo nanawagan sa publiko nga ipatigbabaw ang kalinaw ug kalma dihang gi-implimentar ang suspensyon sa gobernador, ang iyang pagduaw gikonsiderar nga dako og matabang sa pagpabugnaw sa tensyon diha sa Kapitolyo.

Niadtong bisperas sa Bag-ong Tuig gibisita gihapon ni Palma si Garcia  ug sulod sa usa ka oras silang nag-estorhay uban sa banay’ng Garcia una pa kini motambong sa New Year’s Mass sa Cebu Metropolitan Cathedral. (BANAT NEWS)