Way TRO alang ni Gwen

CEBU, Philippines - Magpadayon pa ang ‘standoff’ diha sa Kapitolyo human wala mopagawas og temporary restraining order kagahapon ang Court of Appeals nga maoy gipangayo sa gisuspensong si gobernador Gwendolyn Garcia.

Human sa oral argument kagahapon, ang CA 12th Division wala makakita nga kinahanglan gyung ihatag kang Garcia ang gipangayo niining TRO, kini nagpasabot nga pabilin ang suspension sa gobernador sulod sa unom ka buwan.

Matud pa nga buot pa sa CA nga kinahanglan pa ang dugang argument sa mosunod nga mga adlaw una pa sila mopagawas og desisyon.

Si Garcia girepresentahan sa abogadong si Tranquil Salvador III, ang usa sa mga abogado ni chief justice Renato Corona sa impeachment trial sa naulahi sa nakalabay’ng tuig.

Si presiding division chairman, Associate Justice Vicente Veloso, miingon nga kinahanglang timbang-timbangon pa nila ang interes sa gobiyerno itandi sa interest ni Garcia nga nangangkong gidaog-daog.

 Matud pa ni Veloso ang gahom nila pag-isyu og TRO limitado tungod kay gi-invoke ni Garcia ang Rule 43 sa Rules of Court, nga naglatid sa “judgments or final orders of the Court of Tax Appeals and from awards, judgments, final orders or resolutions of or authorized by any quasi-judicial agency (including the office of the President) in the exercise of its quasi-judicial functions.”

Tungod sa maong rule, matud pa ni Veloso, timbang-timbangon pa sa korte ang epekto kung moisyu sila og TRO.

“Irreparable injury is on the side of the government,” matud pa niya. “Irreparable injury is a very restrictive ground, how can a 60-day TRO correct the irreparable injury (that will be suffered by Garcia)?”  pasabot pang Veloso.

Midugang si Veloso nga kung babagan sa CA ang suspension order sulod sa 60 ka adlaw, suspensuhon gihapon si Garcia ini og kapupos niini ug mobalik na usab sa samang sitwasyon karon.

Sumala pa ni Veloso mapapas ra ang gipangangkong ‘injury’ ni Garcia bunga sa suspension kung kini modaog sa kaso tungod kay mahimo man kining maka-demanda og back wages.

Samtang kung mopagawas ang CA og TRO, tataw kini nga pagsupak sa disciplinary power sa Presidente.

“If we issue 60-day TRO the suspension of six months will be cut by three months and what will remain is three months… So it will constitute irreparable injury to the government compared to that of the petitioner who can be compensated anyway,” pasabot pang Veloso.

Misugyot si Veloso nga mas maayo pang gi- invoked ni Garcia ang Rule 65 sa Rules of Court, nga nag-ingong “any tribunal, board or officer exercising judicial or quasi-judicial functions” issued “without or in excess of its or his jurisdiction, or with grave abuse of discretion amounting to lack or excess of jurisdiction.”

“While in Rule 65 we can issue a TRO, in Rule 43, we cannot,” matud pa ni Veloso.

Ang abogado ni Garcia nga si Salvador miingon nga ang mahinungdanon sa mga Garcia mao ang maka-serbisyo sa publiko ug mabalik ang reputasyon sa gobernador tungod sa maong suspensyon.

Apan si Veloso mitubag sa pag-ingon: “The court is at a bind: shall we consider your petition as not properly filed or give it due course. Again the court does not know what to do. We are three (justices) here, convince us.”

Sumala pa sa abogado ni Garcia wala hatagi og ‘speedy trial’ si Garcia nga iyaha man kining batakang katungod. Subay sa Local Government Code and Administrative Order No. 43 nga nag-ingon kinahanglang maresolba ang kasong administratiba sulod sa 30 ka adlaw.

Gikwestyon usab ni Salvador nganong wala personal gitunol kang Garcia ang suspension order ug xerox copy ra ang gitunol sa staff ni Garcia.

Nagduda usab si Salvador sa timing sa suspensyon tungod kay  giisyu kini usa ka buwan sa dili pa ang election ban sa  Enero 13, diin ang mga elective officials di masuspenso.

Apan ang Office of the Solicitor General, miklarong ang 30-day period dili mandatory aron mopagawas dayon og desisyon ang gobiyerno sa mga kasong administratiba tungod sa kadaghan sa gimbuhaton sa Presidente.

Dili na usab mosaler pa ang TRO tungod kay na-serve naman ang suspension order ug na-implimentar na kini.

Human sa husay, misaad si Veloso nga resolbahon nila ang kaso sa daling panahon aron mahunong na ang tensyon sa Sugbo.

“We feel our legal team was able to sufficiently establish the need for the issuance of a TRO,” sumala pa usab sa anak ni Garcia nga si Atty. Christina Frasco human sa hearing. (/EIM) (BANAT NEWS)