Gwen di malaksi sa listahan sa Comelec — Castillano

CEBU, Philippines - Giklaro ni Provincial Election Supervisor  Lionel Marco Castillano nga makapapili  gihapon  si suspendidong  gobernador  Gwendolyn  Garcia  sa iyang  mga  dumadapig  sa ikatulong  distrito  sa lalawigan  karong  umaabot  nga  election  sa Mayo  bisan  kundili  siya  kaluwatan  og  temporary  restraining  order (TRO)  sa korte.

Ang  maong  pagpatin-aw  gihimo  ni  Castillano  nunot sa  gipalakaw  nga  mga  tabi-tabi  sa  kaatbang  nga  kampo  sa politika  ni  Garcia  nga  matud pa  malaksi  na  kini  gikan  sa listahan  sa Comelec  tungod  sa iyang  pagkasuspenso.

Matud  pa  ni Castillano dili  maapektohan  ang  kandidatora  sa  suspendidong  gobernador isip  kongresista  sa  ikatulong  distrito  ubos  sa  One  Cebu  Party.

Kini  tungod nakasang-at  na siya  sa iyang  certificate  of  candidacy  sumala  pa  ni  Castillano.

Gani  matud  pa  ni Castillano  nga  bisan  ang  usa  ka kandidato  nga  nag-atubang  og  disqualification  case  dili  pa  gihapon  matangtang  sa listahan  sa  Comelec  gikan  sa posisyon  nga  iyang  gilansaran  kun  kini  nakasang-at  og       TRO.

“Sa  bahin  ni Garcia,  si Castillano  nagkanayon  nga  walay  nagpasaka  og  disqualification petition  batok  sa suspendidong  gobernador  busa  walay  rason  nganong  tangtangon  kini  sa Comelec.

Ang suspendidong  gobernador  nagpaabot  nga puno  sa paglaum  nga  ang   iyang petisyon   alang  sa TRO  ikaluwat  sa korte pabor  kaniya  aron  malibkas  ang  suspension  order  nga  gipatuman  kaniya. (BANAT NEWS)