Radaza suportado na sa taga brgy Basak

CEBU, Philippines - Mipadayag  na  sa ilang  hugot  nga suporta  sa administrasyon  ni  Mayor  Paz  Radaza ang mga opisyal sa Brgy. Basak , dakbayan  sa Lapulapu  kagahapon.

Atol sa regular session sa mga sakop sa Association of Barangay Captains (ABC) sa dakbayan sa Lapulapu unang higayon nga mitambong si  Kapitan Isabelito Darnayla  sa Basak human  sa  11 ka tuig nga pagka oposisyon niini.

Matud pa ni Darnayla   nga ang mga kalambuan sa Brgy. Basak nga iyang nakita gumikan sa paningkamot ni Cong. Arturo “Boy” Radaza ug Mayor  Radaza  maoy nakapaaghat kaniya ug sa iyang mga konsehal sa barangay sa pagsuporta sa admistrasyong Radaza  karon.

Giangkon sa mga Radaza nga sila ang miduol sa mga opisyal sa  Basak ilabi   na  kang  kapitan  Darnayla alang sa panaghiusa ug  panaghigalaay.

Kagahapon sa buntag pormal nga mihurar sa atubangan ni Cong. Radaza, Mayor Radaza ug Aileen Radaza (ang magpapiling kongresista) ang walo ka konsehal uban ni  Kap. Darnayla isip pagpamatuod sa ilang hugot nga suporta sa administrasyong Radaza. 

Sa pagkakaron bugtong si Kapitan  Remegio Oyao sa barangay  Agus mao na lang  ang nagpabiling oposisyon sa 30 ka barangay  kapitan  sa dakbayan sa Lapulapu.

(BANAT NEWS)