‘Kawatan’ gisulod sa balay gipusil patay

CEBU, Philippines - Gidu-aw ni “Kamatayan” ang usa ka lalaking dili pa lang dugay nakagawas gikan sa prisohan tungod sa kasong pagpangawat samtang kini natulog sa iyang payag kagahapon sa kaadlawon diha sa dalan Belgium barangay Suba dakbayan sa Sugbo.

Ang biktima nailhan nga si Raymund Jesus Aro, 24, kinsa gipusil diha sa likod ug bukton nakaingon sa iyang kamatayon samtang kini natulog sa higdaanan.

Sa pakighinabi sa Banat News ni PO1 Michael Angelo Singson sa Homicide Section sa Cebu City Police Office, misaysay kini nga ang biktima natulog sulod sa ilang balay dihang dunay naabot nga wala mailhing tawo nga nangita sa biktima.

Ang inahan sa biktima nga si Elizabeth giingong mitubag sa mamumuno nga ‘wa diha balik lang ugma,’ apan nakugang na lang kini nga kalit misulod ang maong lalaki ug diretsong misulod sa gikatulgan sa anak ug gipusil kini.

Ang biktima bisan naigo na daling nakabarog ug mikaratel og dagan apan pag-abot niya sa dalan Wakwak nahagba kini ug gitabangan pagdala sa Cebu City Medical Center diin siya nakabsan sa iyang kinabuhi.

Sa pakighinabi usab sa Banat News kang SPO3 Rey Cuyos, imbestigador sa Homicide Section miingon wala pa nila matino kung unsay motibo sa pagpusil kang Aro apan usa sa gisubay mao ang kalambigitan sa iyang mga kaso.

Sumala pa nga niadto pang bulan sa Disyembre nakagawas gikan sa prisohan sa Aro tungod sa kasong pagpangawat.

“Atong tan-awon kun wala ba siyay atraso diha, ato pa sad nga gisusi ang kaning iyang kaso kun unsay kalambigitan ani,” matud pa ni Cuyos.

Gipadayag usab ni Cuyos nga posibleng nakasukol pa ang biktima dihang gisulod kini sa iyang lawak tungod kay nadunggan man nga nagkagulkol sa lawak niini una pa ang butobuto sa armas. (BANAT NEWS)