Kaguliyang nga gilaraw ni Garcia di mosaler–Davide

CEBU, Philippines -  Ang tinguha sa suspendidong gobernadora nga si Gwen Garcia sa paghimo og disturbo aron magpabilin  siya  sa Kapitolyo  mapakyas  ra gihapon.

Sumala  sa Press Statement  gikan  sa buhatan ni manlalaban  Hilario P. Davide  III, sa Liberal Party sa lalawigan  sa Sugbo  nga  gipahibawo  sila   nga gitanyagan   sa gobernador  og  tag P1,000   ang matag  leader  sa  mga kalungsoran, ug P500 matag  mosalmot    sa  mga  pundok-pundok niini  aron  paghimo  og  kagubot  ug kaguliyang  sa maong mga lugar.

Kining  gipabrika  nga “sentimento sa katawhan” dili  mosaler, sumala  pa  sa maong  pamahayag. 

Midugang  si  Davide   nga  ang  iyang  pagkasuspenso giluwatan isip silot  sa naghinubra niyang  kaabusado  sa otoridad  nga wala  na motahud sa mga probisyones  sa Local Government   Code.

Sa dihang  ang  suspendidong  gobernador  Garcia  nagdumili    sa pagbayad  sa suweldo  sa  mga  kawani  sa   Legislative Branch,  dili kay  ang  pagka-gawasnon  ra sa buhatan  sa lehislatiba   ang  iyang giyatakan, kundi  nakalapas  siya  og  dako  sa balaod, dugang  gibatbat  sa pamahayag  ni Davide.

Si Davide  nga  kandidato  sa pagka-gobernador sa lalawigan  sa Sugbo  ubos  sa LP midugang  nga dihang nagdumili  si  Garcia   sa pagduso  sa iyang  mga  kontrata ngadto sa buhatang  lehislatiba  aron matun-an pag-usab una  aprobahi  dili  kay  ang  hunta ra ang  wa niya tahora,  kundi gilapas  niya ang  balaod.

Sa dihang nagdumili  siya sa   pagdawat  sa silot, dili kay igo siyang  milapas  sa iyang  gipanumpaan  sa iyang  oath  of office, apan miinsister nga ang  mga  Garcia labaw sa balaod, dugang  sa maong  press statement ni Davide.   

Gumikan  niini  tataw  kaayo  nga ang inarogante  niya  nga pagsupak  sa  balaod  maoy  hinungdan  sa iyang  pagkasuspenso, sumala  pa  ni  Davide.

Nagkanayon  si Davide  nga  nagtuo siya  nga  hisabtan kini  sa  mga  Sugboanon.

“I believe that the Cebuanos understand that,” matud pa  niya.

Apan  sa bahin  ni  suspendidong  gobernador  Garcia  nga    bisan  unsay  mahitabo  magpabilin  siyang  gobernador  sa lalawigan  sa Sugbo  ug  dili  siya  mopahawa  sa Kapitolyo  samtang  siya  may  kinabuhi.  (BANAT NEWS)