Estriktong seguridad sa Kapitolyo subling gipatuman tungod sa bakasyon sa New Year

CEBU, Philippines -  Subling gipatuman kagahapon ang mas estrikto nga seguridad sa mga gustong mosulod sa Kapitolyo nunot sa taas nga bakasyon sama sa gihimo sa kapolisan sa niaging semana atol sa Pasko.

Kini samtang padayon ang tensiyon sa pagsuspenso kang Gob. Gwendolyn Garcia sa Malacañang.

Namatikdan nga wala na usab mangita og identification cards ang kapolisan alang niadtong mosulod sa Kapitolyo.

Matud pa sa ground commander, Insp. Genesis Aniversario, nga ang pagpatuman sa maong polisiya mando gikan sa ilang labaw.

Ang polisiya lakip na ang pagpahigayon og checkpoints sa kapolisan kusganong gisaway sa kampo ni Garcia kinsang mga tigpaluyo ang nahasol sa pagduaw kaniya sa iyang buhatan. 

Unang gilibkas ang maong polisiya niadtong adlaw’ng Miyerkules human sa Pasko sanglit balik sa normal nga operasyon ang mga buhatan sa Kapitolyo.

Matud pa ni acting Gob. Agnes Magpale nga siya ang naghangyo sa kapolisan nga libkason ang maong higpit kaayong polisiya gikan niadtong Miyerkules.

Gipasabot si Magpale ni C/Supt. Marcelo Garbo, ang hepe sa Police Regional Office 7, nga ila kining gipatuman gumikan sa taas nga bakasyon ug aron paghatag og seguridad sa Kapitolyo diin anaa si Garcia nagpuyo hapit duha na ka semana.

Ang kampo ni Garcia nisaway sa maong lakang sanglit labaw pa ang talan-awon sa Kapitolyo niadtong panahon sa Martial Law.

Si DILG Secretary Mar Roxas mitin-aw nga dili Martial Law ang ilang gihimo apan maximum tolerance kini sa kapolisan.

Mipasumbingay pa si Roxas nga ang sala nga nahimo ni Garcia sa iyang pagkasuspenso mao ang abuso sa gahom, hangtud karon padayon kining niabuso pinaagi sa wala pagtahod sa kamandoan batok kaniya. (EIM) (BANAT NEWS)