Tag P10mil nga cash assistance sa mga titser ihatag karong adlawa
CEBU, Philippines - Madayon na karong adlawa ang P10,000 nga cash assistance nga iapod-apod sa kagamhanan sa siyudad sa Sugbo ngadto sa kapin sa 5,000 ka mga magtutudlo sa siyudad.
Kini maoy gibutyag kagahapon ni Mayor Michael Rama kinsa miklaro nga duna la’y gituman nga mga proseso hinungdan nga karon pa lang kini mahatag.
Kahinumduman nga sa unang bahin unta ning bulana kini ihatag ug kapila na usab kini nga nauswag ang eskedyul sa pag-apod apod.
Matud pa ni Rama nga dili na lang panumbalingon ang petsa basta ang labing importante nga matunol na kini karong adlawa.
Ang distribusyon ipaagi sa mga school district aron malikayan ang kagubot ug taas nga mga linya.
Gidayeg ni Rama ang mga magtutudlo sanglit mao kini ang maghulma alang sa umaabot nga mga lider sa nasud.
Una na nga gipadayag ni Cebu City School Division Superintendent Dr. Rheamar Angtud nga dako kaayo ang kalipay sa mga magtutudlo tungod niini ilabi na nga na-doble kini itandi sa nakalabay’ng tuig. (/EIM) (BANAT NEWS)
- Latest
- Trending
