CEBU, Philippines - Ang mga membro sa Pag-Ibig Fund kinsa naglisud pagbayad sa ilang utang sa housing loan gihatagan og higayon nga makasulbad niini pinaagi sa pag-apply sa Non-Performing Asset Resolution Program (NPARP) aron dili maimbargo ang ilang balay ug yuta nga gi-loan.
Mao kini gipasabot ni Rio Teves ang manager sa Pag-Ibig Cebu South branch agi og tubag sa mga pakisusi gikan sa mga hingtungdang mga miyembro sa Pag-Ibig nga naglisud pagbayad sa ilang loan.
Matud pa ni Teves nga ang NPARP program gibuksan niadtong Hulyo 2 ning tuiga ug kini motak-op usab karong Enero 31, 2013.
Ang NPARP giumol aron matabangan ang mga membro nga naglisud na sa pagbayad sa ilang binuwan nga datahan sa housing loan
Gibutyag ni Teves nga ang Pag-Ibig Fund mohatag og 30 porsyento nga diskwento sa mga mangutang kinsa mobayad sa ilang bayranan pinaagi sa cash o installment samtang 25 porsyento usab nga diskwento alang sa mga mangutang nga makaimpas sa ilang bayranan pinaagi sa housing loan revaluation.
Ang aplikasyon alang sa NPARP mamahimong i-file ngadto sa Housing Division sa ilang branch.
Alang sa dugang kasayuran, ang interesadong membro sa Pag-Ibig mamahimong motawag pinaagi sa telepono, 4122173 o 5201861. (BANAT NEWS)