Furniture factory ugdaw sa sunog

CEBU, Philippines - Naugdaw ang usa ka pabrika sa mga  muwebles sa dakbayan sa Mandaue   sa sunog  nga  miulbo   sa dalan  Mabini  sa barangay  Looc, sa  maong  dakbayan  sa  miaging  gabii.

Ang nasunog mao ang Cebu Furnitech Marketing apan  ang  building  nga  naugdaw  nga nahimutangan  niining  maong pabrika gipanag-iya  ni Francisco Yang.

Matud  pa  ni Aner Patiño, developmental  manager  sa maong kompaniya  nga  siyam  na  sila  ka tuig  nga nag-abang  sa maong  edipisyo.

Mitug-an siya  sa Banat News  nga  may namatikdan  sila  nga usa ka buto  sa dapit  sa atop  sa maong  building nga maoy  sinugdanan  sa kayo.

Ang caretaker sa maong  edipisyo  nga  nailhan lang  nga Jojo giingong  nakabantay  usab  sa maong  pagbuto  apan kumo  kay  wala  siyay  yawe,  wala  siya  makasulod  niini.

Si Chief Inspector  Ronaldo Orbeta nga maoy city fire marshall sa maong dakbayan  mipaubos sa Task Force Alpha sa maong sunog   busa  miabot usab  sa maong  lugar ang  ubang  kabomberohan  sa Metro Cebu.

Iya  usab  nga  gibanabana  nga  mikabat  og  kapin  sa P2 milyones  ang  kadaot  sa  mga  kabtangan  nga  naugdaw  sa maong sunog.

Matud  pa  niya  nga  nadawat  nila  ang alarma  sa alas 10:45 sa gabii  ug nakontrolar  kini  sa mga  ala 1:20    kagahapon  sa  kaadlawon.

SFO4  Codilla  miingon nga ang kayo nagsugod sa sulod sa maong edipisyo ug mikatap sa tibuok bahin nga maoy hinungdan nga ang mga finish product sa maong furniture firm ang lakip usab sa naugdaw.

Hinuon  walay  mga  panimalay     nga   naapektahan  sa palibot  sa   pabrika  nga nasunog. Apan  giangkon  ni Orbeta   nga   ang Airlift Asia  nga tupad  nga buhatan  sa nasunog  nga  pabrika, wala  gyud masalbar  tungod  kay  mga  asayte  ang  ilang produkto nga  lisud  kaayong  mapawong.

Samtang  si Delia Bayno, accounting  staff  sa Furnitech naghilak  nga mibutyag   sa Banat  News  tungod  sa kabalaka  nga  mawad-an  na  sila  og  trabaho.

Ang nakapait  matud  pa niya  nga  ang ilang 13th month pay  ug ang  mga  pagkaon  nga  ilang  giandam alang  unta  sa ilang Christmas party sa maong  lugar  nahilakip  sa pagkaugdaw.

Padayon   pang  gipahigayon  sa kabomberohan  ang  imbistigasyon  sa maong  hitabo  pagtino  sa tinuod  nga  hinungdan  niini. (BANAT NEWS)