Tiguwang nga namugos pagkobra sa cash assistance giatake patay

CEBU, Philippines - Usa ka 64-anyos nga senior citizen igo rang nakagunit sa sobre sa P4 mil nga cash assistance gikan sa Cebu City Hall ang namatay niadtong Sabado human niya kini nadawat sa barangay hall sa Guadalupe.

Ang namatay mao si Candelaria Quijada sumala pa sa anak aduna nay gihambing sakit ug niadtong Sabado namugos kini pag-adto sa barangay hall aron kuhaon ang cash assistance apan pag-abot sa ilang balay mikaging kini ug namatay.

Kagahapon, atol sa gipadayong distribusyon sa mga financial assistance alang sa mga senior citizen diha sa buhatan sa Office of the Senior Citizen Affairs sa siyudad sa Sugbo misamot kini og kagubot.

Sama sa gipaabot nagdasok ang mga senior citizen gikan sa mga nagbaguod na og lakaw ngadto na sa mga nagsakay og wheelchairs aron lang makakuha sa ilang tag P4 mil cash gikan sa siyudad. Niadtong Sabado una nang gipang apud-apod ang mga financial assistance apan daghan ang wala makadawat maong gipadayon kini kagahapon.

Mitumaw na usab ang kagubot human masutang wala na usab magkadimao ang listahan gikan sa city hall itandi sa mga distributing officers sa matag barangay.

Dugang problema mao nga nahutdan og pundo ang pipila ka mga distributing officers ug kinahanglan pang paabuton ang pag-release niini  gikan sa city treasurers office hinungdan sa kasagmuyo ug pagbagulbol sa mga tawo.

Hinuon kung aduna'y mga nagbagolbol, aduna sa'y mga nalipay human nakadawat sa ilang kwarta.

Matud ni OSCA head Rolando Llaguno sa mga tigbalita nalangan ang distribusyon tungod sa kakulian sa mga ID's ug nagkuwang kuwang nga pundo.

Aron masigurong mahatagan ang tanang angayang makadawat gimando ni Mayor Michael Rama nga lugwayan pa ang pagpang apud-apod karong semanaha apan didto na kini himuon sa ilang mga barangay. (BANAT NEWS)