Kapin 400 na ang patay

CEBU, Philippines -  Miabot na og kapin sa 400 ang nakalas sa pagkusokuso sa bagyong Pablo (Bopha) niadtong Martes sa Mindanao partikular na sa Compostela Valley nga mao ang nagrabehan tungod sa flashflood nga adto miigo sa evacuation center sa lungsod sa New Bataan.

Sumala pa sa report wala masayod ang sagad sa mga nangamatay kung unsay nakaigo kanila sanglit bisan ang ilang gidangpang evacuation center girumbo sa flashflood.

Sayong nakabakwit ang mga tawo apan walay lig-ong istraktura nga nakapanalipod kanila gikan sa bagyo.

Usa sa labing nagrabehan mao ang Surigao del Sur, Davao Oriental, ug Compostela Valley nga pulos na karon gibutang sa state of calamity.

Ang pangulo sa National Disaster Risk Reduction Management Council mipahibalo sa ilang update sa bagyong Pablo nga 322 na ang kompirmadong nakalas ug 378 pa ang pabiling missing ug 401 ang nangaangol.

Ang pangulo sa NDRRMC nga si Benito Ramos miingon nga nagkaanam og saka ang gidaghanon sa mga nabiktima. "Communications are bogged down, there is no electricity, roads and bridges have been destroyed," dugang pa niya sa report sa GMA News Online.

Dunay 177 ka mga tawo ang nakalas sa Davao Oriental, kapin 500 ang naangol ug 21 ang missing. Ang Siquijor mideklarar na og state of calamity diin dunay usa ang nakalas; sa Cebu upat ka tawo ang nakalas, naapektahan usab ang supply sa kuryente sa Bohol, Negros Oriental ug pipila ka bahin sa Sugbo.

Base sa talaan sa NDRRMC miabot og 48,317 ka pamilya sa 25 ka probinsya, 38,084 ka pamilya ang pabiling nagpuyo sa 397 ka evacuation centers.

Usa karon sa giproblema sa New Bataan mao ang pagsugod na og kadugta sa mga minatay nga wala pa ma-claim sa ilang mga kabanay ug kadtong mga bag-ohay pang naugkat gikan sa pagkatabon sa kalapokan.

Kagahapon liboang mga survivors ug mga apektadong residente sa New Bataan ang namiya na sa ilang mga pinuy-anan ug namalhin sa ubang lugar gumikan sa kahadlok nga masubli pa ang trahedya.

Kini tungod sa mikatap apan walay kompirmasyong balita nga dunay nagpadulong nga mas dakong baha sa maong lungsod ug tungod sa kasinatian sa miaging adlaw wala kapugngi ang mga tawo sa pagbakwit.

Samtang sa Sugbo, mipadala na og hinabang si Gob. Gwendolyn Garcia sa habagatang bahin sa lalawigan sa Sugbo ilabi na niadtong mga namatyan og mga mahal sa kinabuhi. Ang upat nga namatay mao sila si Arlene Pila, 44, taga Lower Bserel, Boljoon human kini natumbahi og punoan sa lubi, Ruperta Dialca, 77, taga Guadalupe, Alegria human mahagsai sa iyang balay; Valentino Pimentel, 67, taga Sorsogon,Malabuyoc nga natumbahan usab sa punoan sa lubi ug Aurece Ceballos, 38,  taga Tolosa, Malabuyoc.

Ang naapektohan sa bagyong Pablo mao ang lungsod sa Sibonga, Boljoon, Oslob, Santander, Alegria ug Malabuyoc.

Sumala pa 103 ka mga balay ang nagguba samtang moabut usab sa 610 ka mga balay ang partially damaged.

Mopadala ang Provincial Social Welfare and Development Office og 87 ka sakong bugas, 75 ka karton sa mga sardinas, 60 ka kahon sa noodles ug 103 ka mga sets of kitchen wares ug kini ihatud sa gobernador karong adlawa.

Base sa talaan sa Provincial Disaster Risk Reduction and Management Office nakadawat sa partial damage sa lungsod sa Boljoon nga gilangkoban sa 82 ka mga bangka, 49 niini de motor samtang ang 33 walay motor nga mobalor sa kapin sa usa ka milyon ka pesos.  (BANAT NEWS)