Tinun-an sa day care misalmot sa bangga

CEBU, Philippines - Dul-an 200 ka mga tinun-an sa Day Care gikan sa nagkalain-laing syudad ug munisipalidad sa Central Visayas gitigom  sa taga Department of Social Welfare and Development Field Office VII (DSWD-FO-VII)  sa bag-ohay gipahigayon pa lamang nga nahitabong Regional Children's Contest atol sa ika- 20  nga  kasaulogan  sa  Children's Month didto sa SM City sa North Reclamation Area sa syudad sa Sugbo.

Sumala pa ni Kerwin Macopia, Administrative Assistant V ug tigpamaba sa DSWD-VII nga sa maong  kalihokan gipahigayon usab  ang  kompetisyon nga gitumong aron labing magpakabana  ang  kabataan alang sa proteksyon  sa ilang  pisikal, moral, espirituwal, intelektwal ug social well-being.

Dugang pa niya  nga ang maong kalihokan napuno  sa mga kanta, sayaw, ug  storytelling  nga  maoy gihimong  barahan  sa kompetisyon sa  mga bata  nga nagpangidaron  og 3-4 anyos  diin  tulo ka creative art nga kategorya  ang  ilang  gisangkaan   nga naglangkob sa pagkanta, Folk Dance ug usab Draw and Tell Contest.

Si Gella Medel Vergara sa syudad sa Sugbo ang nahimong 1st place sa kategorya sa awit, diin iyang giawit ang broadway musical song nga "Somewhere" samtang si Charles Novel Villamil sa syudad sa Bayawan ug Niña Mae  Caserial sa syudad sa Toledo ang nakakuha sa 2nd ug 3rd place   ug  usa  sa susamang kategorya gihapon.

Gipadayag ni Macopia nga ang mga bata nga mipakita sa ilang pagkamaayo sa  creative and communicative nga bahin alang sa Draw and Tell nga kompetisyon diin si Mark John Mariano nga taga  syudad sa Dumaguete  maoy  nakakuha sa 1st place samtang si Raiza Mae Tawason sa Balamban, Cebu  maoy  nakakuha sa 2nd place ug si Princess IC Abiero nga gikan sa Pamplona, Negros Oriental ang nakakuha sa 3rd place.

Ang 11 ka contingents ang mipasundayag  sa ilang pagkamaayo musayaw sa Folk Dance nga kategorya diin ang mga bata nga gikan sa syudad sa Sugbo maoy gideklarar nga grand champion samtang ang taga syudad sa Mandaue ug syudad sa Toledo usab ang nakakuha sa runners-up.

Gitug-an ni Macopia nga ang tanang mga mananaog nakadawat gayud og cash prizes ug usab certificate of recognition.

Ang maong selebrasyon gipaubanan  sa   tema nga “Bright Child ay Siguraduhin, Responsableng Pamamahayag ay Palaganapin,” diin gipatigbabaw dinhi ang papel sa media ngadto sa kabataan.

Gibutyag ni Macopia nga ang National Children's Month giselebrar matag tuig sa buwan sa Oktubre agi og  pagtuman sa Proclamation No. 267 nga giluwatan  niadtong 1993 nga gitumong sa pag-ila   sa mahinungdanong papel sa kabataan sulod sa Pilipinong pamilya ug usab sa katilingban sa Pilipinas. (BANAT NEWS)