50 ka balay naugdaw

CEBU, Philippines -  Kapin kon kulang singkwenta ka panimalay ang naigo sa sunog kagahapon sa udto diha sa sitio Magtinabangay sa barangay Tisa pasado ala-una sa hapon.

Ang maong sunog giisa ngadto sa Task Force Alpha tungod sa kakusog sa kalayong mikatap sa nagsing-it nga panimalay.

Si FO3 Emelliano Daño, fire department investigator mibutyag nga ang kalayo nagsugod sa panimalay sa usa ka Oscar Alingasa.

Mibutyag usab si Daño nga usa sa ilang problema mao gyud ang kahuot sa dalan diin ila na lang nga gisumpay-sumpay ang mga hose aron makapasirit og tubig ngadto sa kabalayang apektado.

Dugang pa ni Daño nga laing problema nila mao usab ang kamubo sa mga wirings sa dapit nga maglisod sa pag-agi ang mga dagkong firetrucks.

Laing nasigpatang problema ni Daño mao nga layo ang hydrant diin mao usab kini ang angayang atimanon.

Si Oscar Alingasa nga usa ka bakol, mipasabot nga nianang pagkabuntag, nakabantay siya nga adunay mi- spark sa kisame nga bahin sa ilang panimalay diin nagsubay ang ilang kuryente hinungdan nga iya kini nga gi-tape.

Apan matud pa ni Alingasa nga wala siya magdahom nga ang kinitkitan diay og ilaga mao lang ang makaingon sa dakong sunog sa ilang lugar.

Ang konsehal sa maong barangay nga si Eddie Cabulao, mibutyag nga adunay 50 ngadto 80 ka pamilya ang apektado sa maong sunog nga gikinahanglan usab nilang e-okomodar.

Gibutyag usab ni Cabulao nga ilang i-deklarar og state of calamity ang maong sitio aron usab daling magawas ang ilang calamity fund nga ilang ihatag ngadto sa mga apektadong pamilya.

Samtang si Mayor Michael Rama nga dali usab nga nakadagan sa lugar aron sutaon ang mga problema mipasalig nga ang kagamhanan sa Sugbo moabag sa unang panginahanglanon sa maong lugar.

Matud pa ni Rama nga ila pang tukion kalabot sa kahuot sa dalan diin mao usab ang usa sa iyang nakitang problema sa kabomberohan.

Dugang pa ni Rama nga iya usab nga organisahon ang residente sa maong dapit aron hapsay ang maong lugar.

Usa sa mga residente nga si Simeon Gula, 75, misaysay nga wala gyud siyay nadalang mga kabtangan gawas sa iyang mga kaldero.

Gani, nanglugmaw ang luha niining misaysay dihang iya nang nasuta nga nagkalayo na ang silingan niyang panimalay hinungdan nga dali usab siyang naka-alsa sa ilang kaldero ug gamay’ng senina.

Ang kabomberohan wala pay gipagawas nga kantidad sa danyos atol ning pagsulat sa balita.( EIM) (BANAT NEWS)