Pusil ug dunggab 2 angol

CEBU, Philippines - Duha  ka tawo  ang naangol  gumikan sa pagpamusil  ug pagpanunggab  sa managlahing  dapit   sa  dakbayan  sa Lapulapu  sa miaging  kaadlawon.

Ang  mga biktima  mao  sila  si  Laydio Agosto, 54,  kinsa  napusilan  didto  sa sitio Pool, barangay  Bangkal  sa miaging  kaadlawon  ug  Elmer Mantulo, hingkod, kinsa nadunggaban  didto  sa merkado  publiko  sa maong  dakbayan.

Gitumbok  sa kapolisan  ang  suspetsadong  miluthang  kang Agosto  nga  mao  si Ruben Pungos  nga  iyang  silingan, samtang  ang  miluba  usab kang Montulo, mao ang  usa ka  bayong-bayong  nga  nag-edad  og 17 anyos.

Sumala  ni PO2 Luis Ernie  sa homicide  section  sa kapolisan  sa maong  dakbayan  nga  si Agosto  nakig-inom  sa iyang  mga  higala  nga mibilar  sa haya  sa iyang  asawa.

Dihang  nangalasbag  na, mitumaw  ang  lalis tali  sa suspetsado  ug  sa  usa  ka ginganlan  og  Caloy  nga  ila  ra usab  nga kainom  busa  gipamadlong  sa biktima.

Matud  pa  ni PO2 Ernie  nga gumikan sa kasuko  sa suspetsado, nanghasi  kini  sa  mga namilar ug  milanit  sa iyang  armas  de fuego  ug  mipabuto niini  apan  ang bala   didto  motaroy  sa tiyan  sa biktima  hinungdan  sa   pagka-angol  niini.

Samtang  gihatud  sa mga silingan ang  biktima  ngadto  sa tambalanan,  dali usab  kaayong nakaikyas  ang suspetsado  ug  padayon  pang  gipangita  sa kapolisan.

Samtang  si Montulo didto  sa sulod  sa merkado  publiko  naglakaw-lakaw  dihang  gikasugat  niini  ang  suspetsado.

Apan  sa kalit  lang sa walay igong  hinungdan  gihansakan  sa suspetsado  pinaagi  sa kutsilyo  niini  ang   tiyan   sa biktima.

Samtang  gihatud  ngadto  sa Vicente  Sotto  Memorial Medical Center  sa dakbayan  sa Sugbo  ang  biktima,  nasikop  usab dayon  sa kapolisan ang  suspetsado.

Dihang gisukit  kini igo lang  mitubag  nga  giganahan  lang  kuno  siya  pagparegla  sa biktima.

Nagtingkagol na  kini  karon  sa prisohan  sa kapolisan sa Lapulapu  samtang  giandam  na  ang  tukmang kaso  nga  isang-at  batok kaniya. (BANAT NEWS)