Duha ka suspek sa ilegal nga drugas sa Tuburan mieskapo

CEBU, Philippines -  Duha ka mga bilanggo sa kapolisan sa Tuburan ang nakaeskapo gikan sa karsel niadtong Biyernes sa gabii.            Giila ang mga nakaeskapo mao sila si Jenard Magpuyo, 25, taga Daan Lungsod ug Danilo Navarro, 51, taga barangay Singko sa maong lungsod.           

Matud pa ni PO3 Junyl Ater sa lungsod sa Tuburan nga nianang pagka alas dos sa kaadlawon ang jailer nga si PO1 Jezrel Perigo gikatahong didto sa likod nga bahin sa police station kini aron mokaon.           

Samtang ang desk officer nga si Edsel Condevillamar gikatahong natulog niadtong higayona sa usa ka lawak sa police station ug walay nakabantay sa pag-eskapo sa duha ka mga suspetsado sa kasong may kalambigitan sa ilegal nga drugas.           

Butyag pa ni Ater nga ang duruha giingong milangkat sa tayaong kabilya sa prisohan ug gikan didto milusot aron makagawas.           

Dihang mibalik si Perigo diha pa niya nabantaying wala nay sulod ang karsel hinungdan sa pagpahibalo niini sa mga kaubanan  apan sa ilang pagpangita sa duha wala na kini.           Ang Banat News misuway sa pagkuha sa habig sa hepe sa kapolisan sa lungsod sa Tuburan nga si Insp. Welther Grapa apan ang iyang cellphone dili makontak. (EIM)(BANAT NEWS)