Recamara natagbaw sa iyang performance sa Talisay

CEBU, Philippines -  Ang hepe sa Talisay City Police Station nga si Superintendent Eddie Recamara mibutyag nga daghan siya og nakat-onan sa iyang pagkadestino sa Talisay isip hepe sa kapolisan.

Ug nanghinaot kini nga ang mopuli niyang hepe mapauswag pa unta ang pagdumala niini sa TCPS.

Si Recamara mapasalamaton sa iyang kaubanang polis tungod sa ilang pagkakugihan sa pagtutok sa pagsulbad sa mga krimen ug sa mga opisyal sa siyudad sa gihatag nilang suporta ngadto sa kapolisan.

Si Recamara mibutyag nga ang iyang pag-estar sa Talisay isip hepe kutob na lang kini karong Nobiyembre 30, 2012 human sa pagpahigayon sa thanksgiving mass ni San Pedro Calungsod.

Apan wala na siya mohatag og dugang impormasyon kabahin sa iyang pagka-relibo unya gikan sa Talisay. Ang relief order ni Recamara mahitungod kini sa gipasakang kaso kaniya sa usab ka piskal sa dakbayan sa Danao dihang siya pay hepe didto. Matud niya nga usa sa butang nga iyang nakat-onan sa Talisay mao ang maayong relasyon ngadto sa  iyang mga sakop hinungdan nga nakabaton sila og kahiusahan ug miresulta sa pagkamalamboon sa pagsulbad sa mga krimen nga nahitabo.

“Gamay lang sila pero ang galing nila…dapat ang incoming na hepe ma-maintain o ma-develop pa niya ang talent sa mga polis diri kay kung dili magayran og tarong mawala unya ang ilang galing dili mapakinabangan”, ni Recamara pa.

Si Recamara nagkanayon nga kung dili matarong og giya ang mga polis sa Talisay maapektohan usab niini ang mga Talisaynon. Sa laing bahin, matud ni Recamara nga sa moduha ka tuig niyang pagdumala sa TCPS natagbaw kaayo siya nga napakunhod niya og 40 porsiyento ang krimen sa siyudad sa Talisay.

“I learned a lot of things nga ang kakulangan sa resources dili maoy rason nga ma-ineffective ang mga polis, dapat ang mga polis maayong pagka-manage, dapat maayong pagkadala para tanan sila motrabaho gyud ug good leadership sa taas nga mopakita og suporta”matud ni Recamara.  (BANAT NEWS)