Amerkano nakuhaan og P50M shabu

CEBU, Philippines - Usa ka Amerkano ang gidakop sa mga sakop sa kapolisan human makuhai og balor P50 milyones nga shabu diha sa gipuy-ang condominium sa Makati City Martes sa gabii.

Sumala pa sa report sa GMA News Online, ang suspek nga si Brian Hill, 32, gisuspetsahan na sa kapolisan nga usa ka drug supplier sa mga impluwensyadong mga personalidad dinhi sa Pilipinas. Si Hill upat na ka tuig nga nahimong turista dinhi.

Si Hill bag-ohay pang nakabalik dinhi sa nasud niadtong Lunes sa gabii gikan sa Hongkong dihang gironda sa kapolisan pinasikad sa search warrant nga giisyu sa usa ka korte sa Quezon City. Gawas sa maong shabu nga nakuha sa iyang condominium nakakuha usab ang kapolisan og ilegal nga drugas sulod sa usa ka SUV nga gigamit ni Hill, nasuta nga 'red plate' ang maong sakyanan nga ihatag lang sa mga sakyanang iya sa gobiyerno.

Sumala pa gihapon sa maong report sa pagsusi sa mga awtoridad ang maong plaka sa Land Transportation Office nasuta nga giisyu ang maong plaka sa National Power Corp. apan miklaro ang kapolisan nga sayo pa aron iduhig ang pangalan sa maong ahensya sanglit susihon pa kung ang maong SUV iya ba gyud sa maong buhatan.( EIM)(BANAT NEWS)