Diskriminasyon: bayot giabog sa diskohan moreklamo sa Chr

CEBU, Philippines - Grupo sa mga bayot ug tomboy dinhi sa Sugbo ang gikatakdang modangop sa buhatan karong adlawa sa Commission on Human Rights aron ireklamo ang usa ka staff sa usa ka diskohan diha sa Mango Avenue nga giingong miabog padulong gawas  sa duha ka mga bayot gumikan kay matud pa nagsul-ob sila og pinababaye nga sapot.

Sumala pa ni Japhet Jamin Avellanada nga nauwawan sila og maayo niadtong Domingo sa kaadlawon gumikan kay gisingkahan ug gitukmod sila sa usa ka staff sa maong diskohan padulong sa        gawas.

“Uwaw kaayo mi sa gibuhat sa maong staff, angayan siya nga ma-disiplina. Kung buot huna-hunaon, katulo o kaduha ko sa usa ka semana nga tig-araan diha,” sumala pa ni Avellanada sa dihang nahinabi sa Banat News kagahapon.

Dugang pa niya nga duna siya’y hulagway ug video nga iyang gi-rekord nga nagpakita kung unsa ka arogante ang maong staff nga dili pa niya buot hinganlan sanglit ilaha pa nga sutaon ang tibuok pangalan niini.

“Nahibulong ko pag-ayo kay nganong kami raman ang gipagawas?” pangutana pa ni Avellanada kinsa miingon nga mibayad man sila og entrance fee sa maong diskohan.

Matud pa niya naglalis pa sila sa maong staff nga mipagawas kanila maong midemenda siyang ikahinabi ang tagdumala sa maong diskohan. Human niini diha pa sila pasudla og balik.

“Dili man consistent ang ilang rules, kay nahibulong mi kung nganong kami raman ang gipagawas nga dunay pa ma’y laing mga transgender nga nag-cross dressing sa sulod,” matud pa ni Avellanada.

Ang usa sa mga coordinator sa lesbian, gay, bisexual and transgender o LGBT- Community dinhi sa dakbayan sa Sugbo nga si Mikay Dumabok mibutyag dinhi sa Banat News nga dili nila palabyon ang maong hitabo gumikan kay tataw kini nga paglapas sa tawhanong katungod sa mga nangreklamo.

Matud pa niya nga tabangan gyud sa ilang grupo ang 29-anyos nga transgender nga si Avellanada  sa pagdangop sa CHR karong adlawa.

Gawas niini modangop usab sila sa konseho sa siyudad sa Sugbo gumikan kay tataw nga nakalapas kini sa bag-ohay lang napasar nga Anti-Discrimination Ordinance sa dakbayan sa Sugbo.

Sumala pa ni Dumabok nga gusto sa ilang grupo nga suspensohon ang business permit sa maong diskohan gumikan sa kawala’y respeto sa ilang usa ka staff. (/EIM) (BANAT NEWS)