CEBU, Philippines - Wala mabalaka si Anad Partylist Representative Pastor Jun Alcover Jr., sa gipakanaug nga desisyon sa Commission on Election (COMELEC) nga nag-disqualify kanila nga makasalmot sa 2013 election.
Gibutyag ni Alcover nga kompiyansa siya nga makalingkawas niini pinaagi sa pagpabali sa desisyon subay sa motion for reconsideration nga ilang iduso sa Comelec en banc karung sunod adlaw.
Dugang ni Alcover nga kun dili pa sila matagbaw sa Comelec en banc mahimo nilang dad-on ang maong kaso sa Korte Suprema.
Nunot niini gipasanginlan ni Alcover ang ubang mga opisyal sa Comelec nga nagpagamit sa walhong pundok nga mi-“single out” sa ANAD Partylist pag- disqualify nga unta usa man kini ka multi-sectoral group.
Nasagmuyo si Alcover kun nganong sila lang ug wala gi-apil sa Comelec ang mga militanteng partylist sama sa Bayan Muna, Gabriela, Anakpawis ug uban pa nga gihulagway niyang kaalyado sa mga komunista.
Nagduda siyang ang maong mga partilista maoy nagpaluyo sa pagkatangtang sa ANAD sa listahan.
Nagkanayon si Alcover nga dili niya sibugan kining maong isyu ug kompyansa siya nga makapadayon gihapon ang Anad sa 2013 Elections.
“He who laughs last, laughs louder,” dugang asoy ni Alcover. Nanawagan si Alcover sa ilang mga tigpaluyo nga dili mabalaka tungod kay himuon nila ang tanan aron adunay morepresentar kanila sa Kongreso.
Si Alcover atua karon sa Manila aron makigtigum sa iyang mga abogado alang sa pagsang-at og mosyon sa Comelec en banc.
Sumala pa sa mga report gikan sa The Philippine Star, gawas sa ANAD duna pay laing 18 ka mga partylist ang gitangtang sa listahan. Sa kinatibuk-an aduna nay 69 ka mga partylist groups sa 200 ka gi-beripika ang gitangtang sa Comelec, 45 niini incumbent partytist diha sa Kongreso. Gikatahong ang mga gitangtang dili tinud-anay nga nagrepresentar sa marginalized sector kondili susama sila sa mga ‘advocacy groups.’(BANAT NEWS)