Tagalog Revolt

1574—Nag-alsa ang mga Filipinong Muslim sa Manila batok sa mga Espanyol pinangulohan sa ilang Rajah nga si Lakandula. Ang maong pag-alsa giila usab sa kasaysayan nga Tagalog Revolt dihang nag-alsa si Lakandula ug Rajah Sulayman batok sa mga Espanyol tungod sa dili makatarunganong pagtratar sa mga Espanyol sa mga Filipino ug sa mga negosyanteng Intsik. Dungan sa pag-alsa miatake usab ang piratang Intsik nga si Limahong sa Intramuros, ang dapit diin maglingkod ang gahum sa mga Espanyol. Nalupig ang mga Filipino sa mga Espanyol gumikan usab sa pagdapig sa ubang mga Filipino ngadto sa mga Espanyol tungod sa saad nga sila hatagan og luna ug dili pabayron ang Rajah og buhis, apan wala kini matuman.

Pope Benedict XVI ug Saudi King Abdullah nagtagbo

2007—Sa usa ka talagsaong higayon, nagkahimamat sa personal ang hari sa Saudi Arabia ug ang pangulo sa Simbahang Romano Katoliko. Si King Abdullah sa Saudi Arabia ug Pope Benedict XVI personal nga nagkita sa Vatican niadtong 2007. Gihulagway sa Vatican ang maong panagtagbo nga ‘mainiton’ ug gituki sa duha ang kabahin sa presensya sa mga Kristiyano diha sa nasud ni King Abdullah nga gibanabanang moabot na sa 1.5 milyones apan wala tuguting dayag nga makasimba o mag-ampo atubangan sa publiko.