CEBU, Philippines - Gipasalig sa tagdumala sa Trans-Asia Shipping Lines nga dili angay kabalak-an sa sumasakay nga publiko ang ilang mga barko tungod kay ila kining giatiman aron kaalagarang takus ang ilang mga pasahero.
Sa interview sa DYMR ug Banat News kang Abner I. Llenos, manager sa Trans-Asia, kagahapon sa buntag iyang gibutyag nga ang nahitabo niadtong Biyernes sa gabii sa usa nila ka barko nga nakabaton og problemang elektrikal dili komon nga problema.
Matud pa niya nga matag karon ug unya gipatuman sa tagdumala sa barko ang regular nga maintenance check up sa tanan nilang mga barko.
Apan kun aduna may mga kadaot nga mahitabo sa makina ug uban pang bahin sa ilang barko wala kini magpasabot nga wala nila alimahi ang ilang mga sakyanan sa kadagatan.
Matud pa ni Llenos nga tungod kay kinabuhi sa mga pasahero ang ilang gialagaran, maoy ilang gilantaw kanunay ang kaluwasan niini , busa matag karon ug unya higpit nilang gipabantayan sa ilang mga tripulante ilabi na sa ilang engineering department ang kaayohan sa dagan sa ilang mga barko sa paglawig niini sa kadagatan.
Una molarga ang barko paingon sa iyang destinasyon kanunay nga gipahimangnoan ang tanang tripolante niini gikan sa iyang kapitan, makinista, ug uban pang trabahante sa pagbantay pag-ayo sa dagan sa barko ug labaw sa tanan sa mga pasahero niini.
Apan kun aduna may ginagmay nga problema sama sa pagkapalyar sa makina , o kaha sama sa pagkapawong sa kuryente sa miaging gabii, butang kini nga dili usahay mabantayan apan panagsa ra kining mahitabo matud pa ni Llenos.
Bahin sa problema nila sa ilang duha ka barko sa miaging semana gibutyag ni Llenos nga nasulbad na ang tanan ug gipasalig niya sa publiko nga wala silay laing gibantayan sa kanunay kundi ang kaluwasan sa kinabuhi sa ilang mga pasahero. (BANAT)