Gikan nakigsumbagay namatay sa balay

CEBU, Philippines - Mikaging ug bugnaw nang napalgan ang usa ka lalaki nga giingong nasumbagan sa iyang nakaaway niadtong Domingo diha sa sitio Bulacao, barangay Pardo dakbayan sa Sugbo.

Ang biktima nailhan nga si Joseph Rebrigo Gorit, 45, molupyo sa maong lugar ug giingong aduna kini bun-og sa duha niya ka bukton.

Sa pasiunang imbestigasyon sa kapolisan nasayran nga uwahing nakit-ang buhi ang biktima nga nakig-away niadtong adlaw’ng Domingo (Oktubre 7) sa silingang si Arben Pracillas alyas Ongo.

Mitug-an ang inahan ni Gorit nga si Remedios nga dihang nakauli na sa ilang balay ang anak nagmulo kini nga nalipong og maayo ug labad kaayo ang iyang ulo human masumbagi ni Pracillas.

Sumala pa nga mitug-an kining nasumbagan siya ni Pracillas sa nawong ug natumba ug naparok ang ulo ngadto sa semento.

Usa ka molupyo sa nahitaboan maoy nakasaksi sa maong hitabo ug  maoy mitabang nga makabarog og balik ang biktima.

Apan niadtong Miyerkules sa hapon ilang nadiskubrehan ang anak nga mikaging na sa higdaanan niini.

Sa pagsusi sa kapolisan sa patay’ng lawas duna kini mga bun-og sa mga bukton ug siko, gituohang kini bunga sa pakig-away niini niadtong Domingo apan gisusi pa kung may koneksyon ba kini sa kamatayon ni Gorit.  (BANAT NEWS)