Tulisang napusilan kritikal

CEBU, Philippines - Kritikal ang kahimtang sa usa sa duha ka tulisan kinsa napusilan sa kapolisan sa ilang pag-eskapo human nila tulisa ang usa ka tindahan didto sa barangay Catmon Daan, lungsod sa Catmon niadtong Martes sa alas 7:30 sa gabii.

Ang naangol mao si Smart Argaleon Ugaling, hingkod, minyo ug nagpuyo sa barangay Sabang, siyudad sa Danao.

 Samtang ang iyang kauban nga maoy nagmaneho sa motorsiklo, kansang ngalan wala itug-an sa dinakpan giingong taga dakbayan gihapon sa Danao.

Si SPO1 Januario Sudario sa Catmon Police Station mibutyag sa  Banat News nga ang suspek ug ang iyang kauban kinsa nagpaka-aron ingnong customer miduol sa tag-iya nga nagbantay sa tindahan sa maong lugar ug walay panagana nga gitionan sa ilang armas de fuego.

Gumikan sa kahadlok nga mapusilan, gihatag sa biktima ang halin niya nga P10 mil ngadto sa mga tulisan.

Human makuha ang kuwarta, dali kaayo kining misakay og balik sa ilang motorsiklo ug mipalayo sa maong lugar, samtang ang biktima nga gitulis dali usab nga mitawag sa buhatan sa kapolisan.

Ang kapolisan milihok usab dayon sa  pagpahibawo sa ilang detachment sa barangay Panalipan diin giingong didto paingon ang rumbo sa mga tulisan. Apan tungod kay nakabantay nga may namontar nga checkpoint, mitipas kini og laing dalan ug mipasirit sa ilang sakyanan ug wala maminaw sa kapolisan kinsa mipasalba og warning shot.

Gigukod kini sa kapolisan sa Catmon ug gani mitabang pa ang kapolisan sa lungsod sa Carmen apan wala nila hiapsi ang maong mga tulisan.

Apan ang mga doktor na sa Danao City District Hospital sa siyudad sa Danao maoy mipahibawo sa kapolisan sa Danao bahin sa usa ka tawong samaron sa bala nga nahiabot sa tambalanan. (BANAT NEWS)