Baldebrin milingkod na isip hepe sa MCPO

CEBU, Philippines - Miasumir na sa katungdanan kagahapon ang bag-ong direktor sa Mandaue City Police Office (MCPO)   nga si Senior Superintendent Petroneli Baldebrin   nga hulip kang Senior Superintendent Noel Gillamac.

Si Gillamac nga kapin na sa duha ka tuig nga naghupot sa maong katungdanan mao usab ang mohulip sa gibiyaan nga puwesto ni Baldebrin isip Human Resource Division (HRD) chief sa Police Regional Office (PRO) 7.

Ang gihimong yano nga turnover ceremony gitambongan usab ni Senior Superintendent Orlando Oualat nga maoy chief directorial staff sa kapolisan dinhi sa rehiyon.

Si Gillamac   sa iyang pagkupot sa katungdanan isip direktor sa kapolisan sa maong dakbayan milampos sa pagpakunhod sa mga   krimen sa maong dakbayan nga nakapatagbaw kaayo   kang Mayor Jonas Cortes. Milampos usab si Gillamac sa pagpaluya   ilabi na sa mga krimen nga naglambigit sa nagkaribal nga mga fraternity sa maong dakbayan. Gisulbad usab ni Gillamac sa iyang panahon ang mga kaso sa tulis nga nahitabo sa dakbayan pinaagi sa pagsikop sa pipila ka mga suspetsado ug sa pagpasaka og kaso ngadto kanila.

Si Gillamac classmate ni Baldebrin sa ilang pagtungha sa Philippine National Police Academy (PNP) nga mao usab ang nahimong reference ni Mayor Cortes sa pagpili sa naulahi aron mahimong hepe sa kapolisan sa maong dakbayan. Dihang nahinabi si Mayor Cortes sa mga tigbalita iyang gibutyag nga namatikdan niya si Baldebrin   nga matinahuron kaayo dihang mipahigayon kini og courtesy call sa iyang buhatan.

Gitataw ni Cortes nga iyang gipanghinaut kang Baldebrin nga labi pa gayud niining hingusgan ang padayon   nga pagpakubos sa mga krimen sama sa gihimo ni Gillamac sa pagpangulo niini sa kapolisan sa maong dakayan. (Romeo T. Limpangog/WC) (BANAT NEWS)