CEBU, Philippines - “Unsay koneksyon sa Cordova ug Cebu City?,’ mao kini ang pamahayag ni Cebu City North District election officer Atty. Marchel Sarno kabahin sa hulagway nga napatik sa usa ka pamantalaan nga nagdungan sila og paniudto sa negosyanteng mokandidato sa lungsod sa Cordova nga si Rex “Wakee” Salud sa usa ka kan-anan sa Mandaue City.
Matud pang Sarno nasakitan siya sa headline sa maong pamantalaan sa Sugbo sanglit aksidente lang silang nagkasugat ni Salud ug igo dayon sila nangaon sanglit higala man sila niini. Dugang pa niya nga nangutana ra si Salud kaniya kung unsa ang mga requirements kung mobalhin siya og parehistro sa Cordova sanglit ang maong hulagway nakuha pa niadtong Septiyembre 22 sa usa ka restaurant sa Mandaue City.
Matud pa ni Sarno nga normal lang tubagon sa usa ka election officer kung dunay tawo nga mangutana kaniya kalabot sa requirement sa pagpa-rehistro.
“Unsa may naa ana kung mangutana siya og requirements, trabaho man na nato nga mo-inform sa public kung dunay mangutana nimo,” matud pa ni Sarno. Nagkanayon si Sarno nga dili isyu ang ilang panag-uban niadtong higayona ilabi na nga wala pay filing sa certificate of candidacy sa maong petsa.
“Una sa tanan, wala ko’y pending nga case, maong unsa man pud ang estoryahan namo ni Wakee?” matud pa ni Sarno kinsa miingon nga bisan kinsa mahimong makapangutana sa usa ka election officer.
“Ang mga tawo kay ato nang stakeholders, ug usa na niana mao ang mga politicians .Kung duna sila’y pangutana nato, dapat tubangon na nato og tarong,” suma pa niya.
Si Salud mikandidato sa lungsod sa Cordova bisan paman sa pagkwestyon sa iyang residensya ug mando sa korte nga dili siya makadagan sa maong lungsod tungod niini. (/EIM) (BANAT NEWS)