Daghang kandidato ang walay kaatbang

CEBU, Philippines - Daghan sa mga kandidato sa One Cebu party ang walay kaatbang sa ilang pagpili sa eleksiyon sunod tuig.

Kini mao sila si Michael Sestoso pagkabise-mayor sa Alcoy; Asturias Mayor Allan Adlawan ug Bise Mayor Joel Dumdum; Bantayan Mayor Ian Christopher Escario ug Bise Mayor Geralyn Escario-Cañarez; Carcar City Vice Mayor Mario Patricio Barcenas; Dalaguete Mayor Ronald Allan Cesante ug Bise Mayor Jeffrey Belciña; ug Moalboal Vice Mayor Nelson Abenido.

Samtang walay kaatbang ang mga sakop sa Liberal Party nga sila si Argao Mayor Edsel Galeos ug mga kaalyado sa LP nga sakop sa Barug Alang sa Kauswagan ug Demokrasya (Bakud) sa ikalimang distrito nga sila si Poro Mayor Luciano Rama ug Bise Mayor Edgar Rama; ug San Francisco Mayor Aly Arquillano ug runningmate nga si Allan Arquillano.

Sila si Naga City Vice Mayor Delfin Señor ug Sibonga Vice Mayor Cirilo Apuda, nga mga sakop sa Nacionalista Party (NP), wala usa’y kaatbang.

Ang NP sa lalawigan sa Sugbo nga gipangulohan Kong. Eduardo Gullas mideklarar na og suporta ngadto ni Kong. Pablo John Garcia pagka-gobernador ubos sa One Cebu Party.

Lakip ang apo ni Gullas nga si Gerald Anthony “Samsam” Gullas Jr. ang walay kaatbang sa pagka-kongresista sa unang distrito. Ang kandidato sa pagka-mayor sa lungsod sa Daanbantayan sakop sa NP ni Gullas apan alyado kini ni Kong. Benhur Salimbangon sa One Cebu-National Unity Party.

Ang LP walay kandidato sa pagka-mayor sa lungsod sa Alcantara, Alcoy, Asturias, Balamban, Bantayan, Dalaguete, Naga City, Sibonga, ug Toledo City.Gawas sa unang distrito, ang One Cebu ug LP may kandidato sa pagka-kongresista sa laing mga distrito. Sa Hunta Probinsiyal, ang alyansa sa One Cebu NP adunay 11 ka kandidato batok sa 10 sa LP ug Bakud.

Ang LP adunay tag usa ka kandidato sa pagka-bokal sa una ug ikatulong distrito samtang usa lang usab ang kandidato sa One Cebu. (BANAT NEWS)