Oktubre 7 Pagtabang sa mga bata sa giyera

CEBU, Philippines - 1942—Nunot sa pag-ulbo sa Ikaduhang Kalibutanong Gubat ug sa mga nagkulang nga mga materyales alang sa paghimo og mga armas, tangke, barko, bala ug uban pang gamiton sa pakiggubat, ang gobiyerno sa Estados Unidos midangop sa mga bata sa pagdonar og mga scrap metals kada semana sa ilang pagsulod sa ilang klase sa tanang mga tunghaan sa tibuok Estados Unidos. Ang mga bata gipadala og 10 libras o kapin upat ka kilong puthaw o scrap metals nga ipadala sa nagkadaiyang pabrika sa mga armas. Atol sa maong mga adlaw, ang mga inahan ug ubang kababayen-an nagtrabaho sa mga pabrika sa armas, bala ug uban pa samtang ang mga amahan ug ilang mga bana atoa sa panggubatan.

Bawos sa Sept.11 attack

2001—Human sa makalilisang nga Twin Towers terror attack nga nahimong popular sa bansag nga September 11, 2001 attack sa mga teroristang al-Qaida Organization ni Osama bin Laden giatake sa US ug Britanya inabagan sa ubang kanasuran sa Uropa sa usa ka kowalisyon ang Afghanistan. Ang maong nasud nianang mga tuiga ilawom sa pagdumala sa Islamic extremist government nga Taliban nga giingong maoy gipasilongan ni bin Laden ug diin maggikan ang kamahoan sa mga teroristang miatake sa US. Human sa kapin sa napulo ka tuig nga kampanya nabungkag sa kowalisyon ang Taliban ug nahimo na lang kining usa ka gamay’ng organisasyon apan padayong nakigbisog sa bag-ong natukod nga gobiyerno sa Afghanistan ug sa nahibiling mga sundalo sa Amerika ug Uropa.

Suwat reklamo mga sakyanang way suga

Gabii, Septiyembre 29, 2012 kusog kaayo ang pagbunok sa ulan ug pag-abot nako sa Forest Hills, gi-dim ko ang head light sa sakyanan una pa ko misulod. Daghang motorsiklo, awto ug taksi nga akong gikasugat. Kini walay labot sa mga naglaray’ng habalhabal nga nakapasamot sa paggamay sa dalan.

Dihang sa tan-aw ko hawan na ang agianan, milikay ko nga dili masangit sa mga nakatambay nga motorsiklo ug dihang nakalugar na , mihanag arangkada. Naunsa ba, nga may nagdagtom mang anino nga misugat sa akong agianan.

Usa ka dupa na lang gyud ang distansya pagkamatikod nako nga karaang pedikab nga way suga diay akong gikatagbo.

Maayo gani kay nakabig nako sa tuo ang manobela ug napugngan ang disgrasya. Ang makalagot kay ang drayber pa sa pedikab ang nangasaba. Gusto niining ipagawas nga ako ang nagdanghag samtang siya alisto.

Nakalimot siya nga iyang traysikol di makita sa layo nga nagdagan sanglit walay suga. Pun-an pa nga kusog kaayong ulan, aw murag gitaptapan akong mata sa kahanap samtang nag-drayb.

Delikado kaayo ang maong sitwasyon. Apan ubay-ubay lang gihapon ang mga sakyanang susama niini nga nagbiyahe bisag walay suga. Giunsa kaha sa mga tag-iya no, ang pagparehistro niining ilang depektosong behikulo nga nakalusot man lang gihapon? Ang CITOM, nagpakabana ba niini?

Mas maayo tingale da, nga surpresahon pagbisita sa mga tinugyanan sa balaod kining mga drayber sa habalhabal ug pedikab nga magbiyahia’g mga subdibisyon hangtud sa gabii.

Siyaro’g walay masakpan. Kay kun walay masakpan, something is wrong. Nagpasabot lang kini nga mas abtik ang dakponon kay sa manakop. Unya, lalim ba kining paminawon, Tsip?