Anak sa mga Radaza maoy modagan pagka-kongresista

CEBU, Philippines - Misibog ang beteranong politiko sa Lapulapu nga Kong. Arturo "Boy" Radaza aron hatagan og higayon ang iyang anak nga si Aileen Radaza isip maoy kandidato sa Lone District sa dakbayan sa Lapulapu.

Atol sa usa ka press conference si Radaza uban sa iyang kapikas nga si Lapulapu City incumbent Mayor ug mikandidato pagbalik nga si Paz Radaza pormal nga mipahibalo nga dili na siya modagan pagkakongresista ug ihulip niini ang iyang anak.

Usa sa rason ni Radaza mao ang iyang kahimtang sa panglawas nga nasinati karon ug nagkinahanglan ang Lapulapu og batan-on nga abtik og lihok sama sa iyang anak nga andam na sa maong gimbuhaton.

Samtang si Mayor Paz Radaza sa iyang bahin mipadayag nga mas kinahanglan siya sa katawhan sa dakbayan sa Lapulapu hinungdan nga sila nakahukom nga ang iyang anak ang ihulip sa iyang bana.

Walay maapektuhan sa maong kalambuan gumikan kay padayonon ni Aileen ang mga proyekto nga anaa sa programa sa amahan. Si Aileen usa kanhi ka kagawad sa barangay Mactan ug gradwado sa kursong management sa University of San Carlos ug nagtuon usab kini ngadto sa California, sa Estados Unidos. Kagahapon sa hapon pormal nga misang-at sa ilang kandidatura ang partido Deretso 4 ni Radaza ngadto sa Comelec nga gidawat ni Comelec Officer IV Atty. Ann Jeneth Lamban.

Ang Deretso 4 naglangkob nila ni Aileen Radaza, Mayor Paz Radaza, Vice Mayor Marcial Ycong ug ilang mga konsehales.

Mi-file usab sa ilang kandidatura si Angel Rodriguez isip kongresista sa Liberal Party ug si Efrain Pelaez pagkamayor, retiradong heneral nga si Reynaldo Berdin pagkabise mayor ug ilang mga konsehal.

Laing misang-at og kandidatora mao sila si Carmenia Cabahug, 21, tinun-ang negosyante alang sa pagkamayor, Nino Luis Jamili pagkabise mayor. (BANAT NEWS)