Ulo sa bata napisat

CEBU, Philippines - Napigsat ang ulo sa 9- anyos nga bata human kini maligsi sa trak sa catering service nga giingong nawad-an og brake samtang nagdulhog sa usa ka pribadong dalan sa sitio Saksak, barangay Abucayan lungsod sa Balamban niadtong Sabado sa alas 2:30 sa hapon.

Ang biktima nga patay diha-diha human mopilit sa paril ug trak mao si Great Joseph Saratubias samtang ang nakaligis niya pick up nga gipanag-iya sa Diane Catering Services nga nahimutang sa Labangon siyudad sa Sugbo.

Nabalhog na sa karsel ang drayber sa maong trak nga si Peter Jumalon, 39, taga 15 Capulong St ., San Rafael Village, Navotas Quezon City.

Matud ni PO2 Godofredo Dumdum sa Balamban Police Station dihang nahinabi sa Banat News padulong na pauli ang catering service gikan sa kombira sa maong dapit dihang pagpaandar sa sakyanan nibasiyo ang brake niini ug milahos sa bata ug sa paril.

Nakugang ang mga ginikanan ug bisita sa maong okasyon sa hitabo nga niadtong tungora padulong na mamauli gikan sa maong kombira.