Rama nagpabaya - Osmeña

CEBU, Philippines - Gitataw ni Kongresista Tomas Osmeña nga wala gayud taronga sa pagdumala ni Mayor Michael Rama ang mga tawo niini.

Mao kini ang reaksyon sa kongresista bahin sa kaso nga giatubang ni Rama gumikan sa kapakyas sa pagbayad niini   sa kapin sa P5 milyones   nga balor sa pagkaon   nga gisilbi sa usa ka catering services atol sa eleksyon sa barangay niadtong 2010.

Matud pa sa kongresista nga nagpabaya gyud si Rama sa iyang trabaho hinungdan nga misangpot na hinuon kini sa maong sitwasyon.

Ang komentaryo ni Osmeña may labot sa kiha   sa Cebu Red Carpet Catering Services, Inc. ngadto sa korte batok kang Rama ug kanhi City Treasurer Ofelia Oliva gumikan sa kapakyas pagbayad niini sa P5.2 milyones nga kantidad   sa pagkaon sa mga sakop sa Commission on Elections (Comelec), empleyado sa City Hall, kapolisan ug uban pa nga grupo nga nagsilbi sa piniliay.

Nasayran nga ang siyudad sa Sugbo maoy mihangyo sa Red Carpet   sa pag-supply og   pagkaon sa tanang gipabantay sa barangay election niadtong higayona.

Gani gihulagway nga usa ka “emergency” ang pagpamalit og packed meals   sa dakbayan ngadto sa Red Carpet sa maong higayon human kini balibari sa usa ka food chain dihang nagdumili ang kagamhanan sa paghatag og advance  payment nga katunga sa tanang gi-order nilang pagkaon.

Misaysay ang Red Carpet nga hangtod karon wala pa gyud sila mabayri sa dakbayan luyo sa makadaghan na nga higayon sa ilang pagpaningil niini. Apan si Mayor Rama sa iyang bahin miingon  nga wala siya mabalaka niini ug iya nang gitugyan ang maong kaso ngadto sa City Legal Office.

Samtang si City Administrator Jose Marie Poblete amenado nga nalangan lang gyud ang pagbayad   sa maong utang gumikan sa kadaghang mga gipangayo nga mga supporting documents una mogawas ang kuwartang igbabayad nga maoy ilang gitun-an karon.  (BANAT NEWS)