CEBU, Philippines - Nagkutlo sa iyang kinabuhi sulod sa kalibonan ang usa ka mag-uuma human biyai sa iyang kapuyo sa barangay Patupat, lungsod sa Barili niadtong Huwebes sa gabii.
Ang naghikog mao si Saturnino Pasoluhan, 33, ulitawo, apan dunay kapuyo, ug usa ka mag-uuma nga nagpuyo sa maong lugar.
Si SPO3 Elmer Opsema sa Barili Police Station mibutyag sa Banat News nga ang kabanay niini nga si Terso Pasoluhan, 37, ug Agustin Tampus maoy nakadiskubre niini nga nagbitay nga wala nay kinabuhi sa punoan sa Cacao taliwa sa kalibonan pipila ka metros gikan sa balay niini.
Gisuwayan pa kini og dala ngadto sa Barili District Hospital apan gideklarar sa mga doktor nga dead on arrival (DOA) siya.
Dugang nahipos nga impormasyon sa kapolisan nagbutyag nga si Pasoluhan mitipon na og puyo sa iyang amahan human biyai sa iyang kapuyo kansang ngalan gipugngan.
Nasuta sa mga kabanay nga gikaguol kaayo niini ang pagbiya sa iyang kapuyo kay kanunay nalang kining naghinuktok, dili na magtingog-tingog ug ingon og nawad-an na og gana sa kinabuhi.
Ang mga kabanay niini nagkanayon nga katapusan nilang nakit-an si Pasulohan niadto rang Miyerkules ug sa Huwebes sa buntag wala na nila kini hikit-i nga magpakaon sa iyang mga binuhi nga kabaw hinungdan nga ilang gipangita.
Apan patay na kini dihang ilang nakita ug kombinsido ang tanan nga wala kini among-amongi og laing tawo. (/WC) (BANAT NEWS)