Nanghasi Gipusil Patay Sa Swat

CEBU, Philippines - Nabuslot ang dughan sa usa ka drayber nga nanghasi human kini pusila sa sakop sa Special Weapons and Tactics (SWAT) didto sa merkado publiko sa Taboan, barangay Pahina Proper ning dakbayan sa Sugbo kagahapon pasado ala 1:00 sa kaadlawon.

Ang biktima nailhan nga si Marvelon Cañete Villanueva alyas Bundak, 37, usa ka family driver ug molupyo sa maong lugar apan lumad nga taga Pook Aguinaldo, UP Campus, Diliman, Quezon City.

Sa pasiunang imbestigasyon sa kapolisan nasayran nga ang biktima nanghasi sulod sa merkado tungod sa iyang kahubog nga nakahadlok sa mga tawo tungod kay nagpasalba kini sa iyang armas de fuego, busa ilang gisumbong sa mga sakop sa SWAT nga didto sa buhatan sa kapolisan sa Taboan.

Dihadiha miresponde dayon sila si PO2 Michael Grandea Baylon, 30, ug PO2 Nemesio Marfa Paragasa, 29 apan wala nila kini hiabti ug pinaagi sa sumbong sa mga nakasaksi,    didto nila kini hikit-i sa dalan Panganiban sa gilay-ong 500 metros gikan sa Taboan Market.

Giduol kini sa maong mga polis ug nagpaila pa sila nga sakop sila sa SWAT apan dihang hinulon na unta ni Paragasa ang lawas niini isip standard operation procedure (SOP) gikatahong abtik kining milanit sa iyang pusil, hinungdan nga gitukmod kini ni Paragasa ug dihang natumba gipusil dayon ni Baylon.

Ang biktima nga nabukobuko sa pagkaigo milapos ang bala sa dughan niini nga maoy hinungdan sa hinanali niining kamatayon.

Ang hepe sa Homicide Section sa Cebu City Police Office Sr. Insp. Jamil Mohammad Jamiri, mibutyag sa Banat News nga kun husto ang gihimo sa duha ka polis apan ila gihapon kining pasakaan og kasong homicide. Mipasabot si Jamiri nga usa ka SOP ang gihimo sa duha ka polis nga mohikap unta sa lawas sa biktima tungod sa report nga aduna kini armas.

Samtang ang hepe sa kapolisan sa syudad sa Sugbo,   nga si Sr. Supt. Melvin Buenafe mibutyag usab nga lehitimo ang gihimo sa duha ka sakop sa SWAT tungod kay delikado ang ilang kinabuhi kun wala pa nila unahi og pusil ang biktima. Matud pa ni Buenafe nga walay mahimo ang duha ka polis   gawas sa pagpusil sa biktima agi og depensa sa ilang kaugalingon.

Nakuha sa kapolisan sa crime scene mao ang usa ka kalibre .38 nga revolver nga gipanag-iya   sa biktima ug usa ka kabhang sa bala sa maong armas ug laing duha ka buhing bala niini.

Gikustodiya karon ang duha ka polis ni Supt. Arnel Banzon ang hepe sa SWAT samtang gisurender usab niini ang ilang armas nga M161A.

Sa laing bahin, kritikal ang kahimtang sa usa ka suspetsadong snatcher kinsa gipusil sa w ala hiilhing kriminal   didto gihapon sa Taboan Public Market kagahapon sa hapon.

Ang biktima nailhan nga si Vic Michael Fabricante, 23, kinsa nasabak sa tampihak kansang bala milapos sa tuong bahin sa iyang nawong.

Sa nasayran nga ang biktima naglakaw sa maong lugar dihang kalit kining gihunongan sa usa ka wala hiilhing tawo nga nagsakay og motorsiklo ug mipusil niini sa walay igong hinungdan.

Ang biktima daling gidala ngadto sa Cebu City Medical Center samtang ang mamumuno kinsa nakasibat dayon gipangita pa sa kapolisan. (/WC)(BANAT NEWS)