CEBU, Philippines - Mikabat sa P11 mil nga koleksyon sa usa ka lending collector ang nasakiyo sa duha ka wala hiilhing armadong mga tawo nga mitulis niini didto sa barangay Balungag sa lungsod sa San Fernando niadtong Martes sa buntag.
Ang biktima mao si Jerwin Poaoy, 28, ulitawo, taga lungsod sa Argao ug kolektor sa Rafi Micro Finance Lending kauban ang drayber niini sa motorsiklo nga si Jerecho Acmansa.
Si SPO2 Victor Cuyno sa San Fernando Police Station mibutyag sa Banat News nga ang biktima ug ang drayber sa kompaniya nagsakay sa motorsiklo aron pagkolekta sa mga bayad sa ilang mga customer.
Apan samtang nagsubay sila sa barangay road sa maong lugar giatangan sila sa duha ka wala hiilhing tulisan kinsa mipara kanila ug sa ilang paghunong gitiunan dayon sila sa mga armas niini dayong deklarar nga tulis.
Tungod sa kahadlok sa biktima gihatag niini ang iyang bag nga maoy gisudlan sa ilang koleksyon nga mikabat sa P11 mil.
Human madawat ang bag, dali kaayong nakapahilayo ang duha ka mga tulisan gikan sa maong dapit sakay usab sa ilang motorsiklo.
Walay laing nahimo ang mga biktima gawas sa pagsumbong sa kapolisan sa maong lungsod.( /WC) (BANAT NEWS)