Player sa basket gikasuyaan gipusil angol

CEBU, Philippines - Kritikal ang kahimtang sa usa ka basketball player human kini pusila sa wala hiilhing kriminal didto sa barangay San Isidro lungsod sa Asturias niadtong Lunes sa gabii.

Ang biktima mao si Michael Nardo, 26, ulitawo ug nagpuyo sa nahisgutang lugar.

Si PO3 Manuel Gilamon sa Asturias Police Station mibutyag sa Banat News nga ang biktima mao pay pag-abot sa ilang balay apan mosulod na unta kini dihang gipauwanan sa bala.

Ang biktima samdan sa nagkalainlaing bahin sa iyang lawas nga gibiyaan sa kriminal sa pagtuo nga mabugtoan sa kinabuhi ang biktima.

Gihatod dayon nila kini sa tambalanan sa lungsod apan gumikan sa katalandugon sa kahimtang gibalhin kini ngadto sa Vicente Sotto Memorial Medical Center sa dakbayan sa Sugbo.

Dugang nahipos nga inpormasyon sa kapolisan nagbutyag nga maayo moduwa og basketball ang biktima ug kadtong nangapildi nga mga sugarol sa duwa niini niadtong Lunes malagmit maoy misuway sa paghunos sa kinabuhi ni Nardo.

Gidudahan nga ang kriminal kontra sa biktima ug malagmit naglagot kini tungod sa kamaayo moduwa sa naulahi.

Ang kapolisan padayon pang nihimo og lawom nga imbestigasyon sa maong hitabo. (Darrel A. Carumba/WC) (BANAT NEWS)