CEBU, Philippines - Ang kinatiguwangan nga lumulopyo sa dakbayan sa Mandaue nagselebrar sa iyang ika- 106 nga adlaw’ng natawhan kagahapong adlawa.
Si Olympia Judilla nga taga Paknaan sa dakbayan sa Mandaue natawo niadtong Septiyembre 17,1906.
Si Judilla aduna lama’y usa ka anak nga si Lucianga nagpangidaron na karon og 76-anyos ug inahan ni Subangdaku Police Station chief P/Insp. Ramil Morpos .
Gawas kang Morpos aduna pa siya’y laing lima ka mga igsuon nga pulos apo ni Olympia samtang aduna usab siya’y napulo ka apo sa tuhod.
Matud pa sa nagbinungtong anak ni Olympia nga si Lucia nga hangtod ning tungora iyang inahan baskog pa gumikan makalakaw pa kini gikan sa iyang kwarto padung sa sala sa ilang balay.
Matud pa usab ni Lucia nga sukad–sukad wa gyud makasuway iyang inahan nga ma-hospital sanglit ang nasinati lamang niini mao ang sakit nga ubo ug sip-on ug panaglagsa nga rayuma.
Sumala pang Lucia nga ang sekreto nganong nagpabilin nga taas ang kinabuhi sa iyang inahan mao nga utan lamang ang kinaon niini ug kinahanglan nga way vetsin ang iyang sud-an.
Nabuhi ra usab niadto ang iyang inahan sa panguma sanglit niadto hawan pa man nga basakan ang barangay Paknaan.
Sanglit wa may kaugalingon nga basakan iyang inahan suholan lamang siya og tag lima ka kahon matag ting-ani ug kun human na ang tingtanom, maglubok na usab siya ug buli aron himoon nga landang.
Matud pa usab ni Lucia nga “no read, no write iyang inahan” apan memoryado niini ang tanang pangadyeonon sa simbahan.
Si Olympia maoy usa sa duha ka mga tiguwang nga pasidunggan karong umaabot nga Senior Citizens Week sa dakbayan sa Mandaue karong buwan sa Oktubre, ang laing usa mao si Emiliana Cabrera nga nagpanuigon na og 100-anyos nga taga Subangdaku, silang duha makadawat og tag 50 mil pesos ug plaque gikan sa kagamhanan sa siyudad. (/EIM)(BANATNEWS)