1991—Gipalagpot sa Pilipinas ang mga Amerkano sa ilang mga base militar dinhi sa nasud nga mao ang Subic Naval Base sa Olongapo City ug ang Clark Air Base sa Angeles City, Pampanga nga niadtong mga panahona gisugdan na og abandonar sa mga Amerikano tungod kay natabunan og abo sa pagbuto sa Mt. Pinatubo . Septiyembre 16, 1991 dihang gibotaran sa Senado 12-11 ang dili na pag-renew sa kontrata pag-abang sa US sa maong mga base militar. Tungod niini, nawala ang dul-an 400 milyones dolyares nga hinabang gikan sa US. Ang US miokupar sa Subic Bay sukad pa niadtong 1898 dihang gilupig sa Amerika ang mga Espanyol, apan ang Senado bisan pa man mas daghan sa mga Filipino ang pabor nga ipabilin ang mga base militar mas nagpatigbabaw ang dungog ug garbo sa tuyo nga putlon ang panglantaw sa kalibutan nga ang mga Filipino saop sa mga Amerkano.
International Ozone day
2007— Karong adlawa handumon sa kalibutan ang International Ozone Day sukad nga gideklarar karong petsaha sa United Nations General Assembly nga International Day for the Protection of the Ozone Layer niadtong Disyembre 19,1994. Una niini, ang mga lider sa nagkadaiyang nasud ingon man mga representante sa mga grupong nag-amping sa kalikopan ug mga kontra polusyon nagtagbo sa Canada diin naumol ang Montreal Protocol niadtong Septiyembre 16, 1987. Tuyo sa maong kasabotan mao ang pagpangita og paagi sa nagkadaiyang miyembro o milagda sa maong protocol nga mamenusan ang polusyon aron maprotihian ang ozone layer. Ang ozone layer mao ang nipis nga bahin sa stratosphere nga nagsilbing payong sa kalibutan batok sa makamatay nga init sa adlaw. Ang polusyon ilabi na sa paggamit og aerosol perfumes, gidili nga kemikal sa aircondition units ug ang pagsunog og plastik maoy nasutang numero unong nakapabuslot sa ozone layer hinungdan sa pag-usab sa dagan sa panahon karon ug pagtumaw sa mga katalagman bunga sa climate change.
Malaria
1932—Namatay ang English physician, bacteriologist ug mathematician nga si Sir Ronald Ross. Siya maoy nakadiskubre diing parteha sa anopheles nga lamok makita ang malarial parasite ug mitumbok niini nga maoy sinugdanan sa sakit nga malaria. Tungod sa iyang nadiskubrehan siya nahatagan og Nobel Prize for Physiology ug Medicine niadtong 1902 ug maoy labing unang Briton nga nahatagan og susamang pasidungog. Si Ross usab mao ang unang subsob nga mieksperimento bahin sa malarial parasite sa mga lamok ug mao usab ang nakadiskubre sa matang sa lamok nga nagdala sa sakit nga African fever. Nahimong sumbanan sa ubang mga doktor ug eskperto nga nangita og mga tambal ug pamaagi pag-alkontra ang malaria ang iyang nadiskubrehan.